Google…حلم الموظفين الغلابة
قووقل….و ما أدراك ما قووقل
قبل كم يوم انتهيت من كتاب “قصة قووقل” اللي يحكي بداية قووقل كفكرة في رؤوس “لاري بيج” و “سيرجي برين” في أواخر القرن اللي فات إلين صارت شركة تقدر بمليارات الدولارات….بإختصار…..أرفع القبعة تحية لهذه الشركة العظيمة!
ما راح أدخلكم في معلومات تقنية كثير…محرك بحث قووقل بكل بساطة هو مجموهة من المعادلات الرياضية تساعد المستخدم انه يلاقي اللي يبغاه بسرعة…
هدفي من التدوينة هذي هو التركيز على جو العمل الخطير في مجمع قووقل Googleplex ….نقدر نقول عنها بإختصار حلم أي موظف غلبان!
المزايا في Googleplex لا تعد و لا تحصى….ابتداء من الوجبات و المشروبات المجانية …..و الملاعب بجميع أنواعها….و صالات الفيديوجيمز و الجيم و حضانة للأطفال للموظفات الأمهات و غيرها الكثير من الأشياء اللي تخلي الموظفين يقعدوا طول يومهم داخل الشركة
سؤالي….تتوقعوا ليش الشركة بتعمل كذا لموظفيها؟
أي شركة ذات بعد نظر تعرف انها اذا تبغى موظفيها يبدعوا و يبتكروا لازم توفر لهم جو يساعد على ذلك…و قووقل قطعت شوط كبير في هذا الشي….و اللي متابع لأخبار و منتجات قووقل أول بأول يلاحظ هذا الشي…
لاري و سيرجي….مؤسسا قووقل مثال ل”الرؤساء الفلة” اللي مالهم وجود في عالمنا العربي….كانوا يعرفوا معظم أسماء موظفيهم بالأسم الأول قبل لا تتوسع عمليات قووقل بشكل كبير….و دايما فالينها و ما عندهم شغل العقد حق المدير و الموظف
نموذج قووقل لازم نطبقه في عالمنا العربي و صدقوني راح نشوف زيادة في الانتاجية بشكل رهيب….قبل فترة صار لي موقف للأسف حاز في نفسي إلى الأن…..مجموعة من طلاب جامعتي عملوا عرض عن باوربوينت عن تاريخ القضية الفلسطينية….قمت نشرته في ايميل الشركة بحسن نية عشان الكل يستفيد منه….هي كلها دقايق و يجيني اتصال من مدير الموارد البشرية و هاتك يا تهزيء و الايميل دا للعمل بس مو للأغراض الشخصية….تصدقوا انها وصلت لأنه يهددني بالفصل؟!…هذا كله عشان عرض باوربوينت!
مشكلة العرب انه فينا جعاصة و نفخة كذابة لما نمسك مناصب…..و ياريتنا فالحين في شي!
عموما….تسعة أعشار الرزق في التجارة…لا مدير يقرفك و لا يذلك…..و أكبر دليل أص1حاب قووقل من بعد ما استلفوا 100 ألف دولار عشان يبدأوا مشروعهم دحين كل واحد منهم في رصيده 10 مليار دولار بالصلاة على النبي
و يا قلبي لا تحزن!
أعجبني
:)
على
السلام عليكم
الكتاب عندي وإلى الآن ما بدأت فيه ( تعرف كيف سنة الأوريا
)
شكله الكتاب روعه ببدأ فيه من بكره إن شاء الله يكون خلصنا اختبارات.
لو تعرف قد ايش أنا أتكلم عن قووقل أخوي وسيم لكن أرى الكل يقولي محرك بحث محرك بحث
والله وأضحك من الرد هذا مع العلم اني اتكلم مع ناس ناس لهم علاقه وعشق بهذا المجال 
ولكن شقول بس!
ماعندي تعليق على كلامك عن الشركه لكن بعد ما أقرأ الكتاب راح أعلق عن بإذن الله.
بخصوص اخر جزء من التدوينه فهذه لا تعليق عليها عزيزي كلنا نعرف نحنا كيف عايشين وكيف لمن نمسك مناصب ( أقول نحنا وأنا منكم عشان لحد يقولي شي
)
وتسلم لي على التدوينه والله حمستني إني أقرأ الكتاب
MS
واله ماودي اقول الا
قد أسمعت إذ ناديت حيا…….ولكن لا حياة فيمن تنادي
==============================================
هنا عندك ادارة تفكر في المظاهر والاشكال
فلان يدشن … علان يفتتح …
=========================================
الله يخلف علي…والله اني خايف اني بس عساني احصل وظيفه
خصوصا اني من KFUPM
=====================================
مشكور على التدوينه الرائعه وانا اقول لك
اني سبق وشفت صور من داخل قوقل صراحي شي يستاهل انك تدفع فلوس عشان تشتغل عندهم
أقول اخوي فيصل لا ترعبني بس
تراني اوريا
MS
آية الله قوقل من أحدث فارقا كبير في علم المعلومة…
تدوينة جميلة ، وسلملي على مدير الموارد عندكم وأتوقع لو كانت الرسالة نكتة سامجة ولا صور طريفة ما كان قال شي ،،،
الله المستعان
الادارة فن قبل ماتكون علم
اذكر يوم اخدت مادة الادارة في دراستي قرفونا وهم يقولوا (الادارة علم وفن مع بعض) ..
المشكلة انو كل فنون الادارة تلاقيها موجودة في الكتب عندنا وندرسها نظريات واثباتات وفرويد وماني عارفة ايش ….. كلام لا ينتهي ..
لكن ..
بس ننزل ارض الواقع نلاقي كل الكلام ذهب ادراج الريح ،،
ازيدك بس من الشعر بيت
في عملي مسمى وظيفتي مبرمجة >>> بس ابشرك مابقي شغلة ما مسكتها بس باقي اشتغل مكان العاملة ويصير كدة شيكت على كلو !!
وفي النهاية انواع التحطيم ولا في دعم معنوي او مادي .. من جد حاجة تخلي الواحد يكره العمل والانتاجيه ..
لكن الشكوى لله
الله يعوضني بإدارة زي ادارة بيج وبرين
يعجبني فكر قوقل ، ياقوقل ياقوقل تعال علمنا كيف ندير شركاتنا
الله يعيني يا رجال
تحياتي
مشكلة اغلب مدرائنا يخافوون انهم يعطون الموظفين ” وجه”
ومن ثم يفلت من ايديهم موضوع “ادارة الموظفين”
بس الموضوع مجرد مهارات ادارية بسيطة تجعل العمل متعه وليس فرض
يبغلنا قرن الين مانوصل مستوى قوقل
نعم !
الحق أن قوقل عرفت من أين تؤكل الكتف ولم تخضع لقوانين الإدارة ( أكس واي زد ) وإنما استحدثت قانون جديد بالإدارة .. وهي الإدارة بالمشاعر !
الإدارة العليا بقوقل .. عرفت ما هي احتياجات الإنسان كي يعطي .. وخاطبت جانب العطاء في المرء لا جانب الخوف ..
شكراً لك
الصورة بالف كلمة
مرة شفت تقرير عن قوووقل على احد القنوات الفضائية اكثر شي ابهرني انه ما فيه لباس رسمي تجي باي لبس ماعندك اي مشكلة وغيره انهم حاطين قاعة فيها طاولات باشكال غريبة عشان يكسروا روتين العمل المعتاد
والله لو كان تخصصي مطلوب بهالشركة كان حلمت بالعمل فيها
هاي صح الموقع حلو بس ياريت تحط فيلو اشياء تانيه
لولـ
ذكرتني بتويتة قراتها .. واحد يقول انه جاله اتصال من صديق يطلب مساعدته في عمل موقع مثل غووغل.. بس
هنا يجي دور المهندس الصناعي اللي يريح الموظف عشان يشتغل صح
تحياتي