تجارة الزواجات…
الموضوع هذا ممكن يخليني عدو البنات رقم واحد….لكن ما يهم….هذي قناعة و صلت لها و راح أقولها و اللي يصير يصير و ما يهمني أحد….
السيدة سوزي تحدثت في مدونتها المثيرة مغامرة سوزي الكبيرة عن قصة زواجها من حب حياتها “عدنان”….ملخص القصة بإختصار للي إنجليزيته ضعيفة و اللي مكسل يقرى كالتالي:
- عدنان راح أمريكا يدرس
- سوزي شافت عدنان
- سوزي ماتت في دباديب عدنان
- رسمت و تكتكت إلين ما جابت رجله
- عاشوا قصة حب حلوة
- لكن سوزي ما كانت متأملة نهاية سعيدة لأن عدنان قالها حأخلص دراسة و حأرجع أتزوج وحدة سعودية
- عصرت على قلبها ليمونة المسكينة و ما تمادت في أحلامها
- تخرج عدنان
- رجع السعودية
- ما لقى شغل في تخصصه
- هي كلها ستة شهور قعدها في السعودية بعدها رجع تاني لأمريكا
- راحت سوزي استقبلته في المطار
- حضنها و قال لها: تتجوزيني؟
اللي حيقعد يقول هذي الحركات مو عندنا و مدري ايش أقول له أرمي كل الكلام اللي فوق ورا ظهرك و جايك العلم الأكيد
- طبعا قالت ايوة
- أتصلت على أمها و قالت لها زواجي من عدنان بعد خمسة أيام يلا جهزي لزواجي
- جهزت الأم أشياء حفلة الزواج: ديكورات بسيطة في البيت اللي مزين أصلا عشان حفلة الكريسماس، كيكة 3 طبقات ، صحون المقبلات حق الحفلات، واحد من أقاربها تكفل بالتصوير الفوتوغرافي، أخوها بتصوير الفيديو. الدعوات كانت شفوية و اللي قدر يحضر حضر و اللي ما حضر معذور
تتوقعوا كم كلفت الحفلة هذي؟ 500 دولار بس….يعني 2000 ريال و عشان أكون حقاني 1874.30 ريال حسب سعر صرف اليوم من موقع XE Currecy
أعتقد بعد المقدمة هذي استعديتوا خلاص للي جاي…للشي اللي ممكن يكلفني الكثير…
خلونا نحسبها “بالسعودي” و نشوف كم تطلع:
- مهر: 30 ألف
- شبكة: 10 آلاف
- عربية ملكة بمحتوياتها: 10 آلاف
- إيجار بيت: 25 ألف
- أثاث : 30 ألف
- قاعة: 30 ألف
- عشا: 15 ألف
- شهر عسل: 15 ألف
- هدايا و خلافه: 10 آلاف
- طقاقة-جني يطق راسها ان شاء الله-: 20 ألف
المجموع= 200 ألف ريال….ريال ينطح ريال
سؤال يا جماعة…خصوصا للبنات…و ياريت تجيبوا أمهاتكم جنبكم عشان تحاولوا تجاوبوا على سؤالي سوا: بالله عليكم من فين يجيب واحد شاب في بداية حياته هذا المبلغ كله؟
يسرق؟
ينهب؟
يختلس؟
يقترض من البنوك و يصير عبد لها طول حياته؟
لا تقولوا لي مو كل الناس كذا و ان في ناس تسوي زواج “عالقد”….و الله ثم و الله ثم و الله حتى “عالقد” حقكم هذي فيها أشياء ما ترضى أي بنت انها تتنازل عنها بحجة انها “ليلة العمر”
و الله اللي تختصر عمرها كله في ليلة وحدة هذي إنسانة أنا شخصيا مالي لزمة بيها و لا أبغاها….
و لا يجيني أحد يقول لي الوالد يساعد….ترى انت ما تتكلم عن نفسك بس…مو كل الشباب آبائهم يساعدوهم…
يعني مثلا عربية الملكة هذي- قطعة الخشب هذي اللي قيمتها في حدود السبعة آلاف ريال- ايش لزمتها؟
و لا القاعة؟ لازم يعني أعزم كل من هب و دب و في النهاية ما راح يعجبهم شي و حيطلعوا يحشوا….اشبه الزواج في البيت البنت تعزم أعز صحباتها و الولد يعزم أعز أصحابه و انتهينا…و لا العشا اللي نصه يترمي في الزبالة…و اللي فاكر ان هذا كرم أشك في قواه العقلية…هذا كفر صريح بالنعمة…
أحد التبريرات في هذا الموضوع إن اللي يبغى يتزوج يحس بقيمة البنت اللي حيتزوجها….و انه لازم يتعب عشان يوصلها….يفكرني بأمي لما اشترت لنا البلاي ستيشن زمان: تراه غالي اشتريته لكم ب 1080 ريال هيا حافظوا عليه و يا ويلكم لو خربتوه…و احنا نرتجف رعب لما نحط سيدي او نشيله عشان لا نخرب العدسة…يعني البنت زيها زي السلعة ممكن تتغير في أي وقت…
بالله هذا منطق يا جماعة؟ هل التعب من أجل وحدة معناته ان أدفع اللي ورايا و اللي قدامي و أتسلف و أتبهدل في بداية حياتي؟ مو معناته أتغرب عن أهلي و أسهر الليالي عشان آخذ شهادة محترمة تجيب لي وظيفة مرموقة تعيشني حياة كريمة؟
سؤال قاعد يقطع مخي: بالله عليكم ايش اللي يحدني اني أدفع مبلغ زي كذا عشان وحدة لا أعرفها و لا تعرفني…راس مال المعرفة بيننا شهرين ثلاثة بالكثير؟….من جد يا جماعة نوروني يمكن في حاجة غايبة عني…
تقولوا لي عادات و تقاليد؟ يا جماعة أنا كفرت بعاداتكم و تقاليدكم و طز فيها و في اللي يتمسك فيها في زمن زي هذا…و اللي بيصرف عليا يقطع المصروف….
هذا زماننا احنا….مو زمان آبائنا و أجدادنا…خلاص أخذوا زمانهم و راحت عليهم……هذا زماننا نعيشه حسب ظروفنا….نسن فيه قوانينا و أحكامنا…احنا أدرى بزماننا…مو شلة المومياوات اللي أكل عليها الزمن و شرب و الا بالغصب يبغونا نكرر أخطائهم و أغلاطهم…فرضوا علينا عاداتهم إلين ما صارت ألزم من الدين عند البعض…
العزاب كثير و العوانس أكثر…و يستغربوا لما ولد ينحرف و لا بنت تلعب بديلها…و نسيوا انهم هم السبب في كل هذا..
إلى كل أب….خاف الله و اتبع سنة نبيه
إلى كل أم….بطلي الهبل الزايد ولا تتعبي خطيب بنتك بطلبات ما يقدر عليها..
إلى كل بنت…الواقع غير و النهايات السعيدة حق الأفلام الهندية غير….لا يضحك عليكم شاروخان و طقته
إلى كل شاب…إذا انت مقتنع بكلامي ترى ما في شي يحدك على البهدلة هذي كلها….العالم واسع و كبير و مليان بالفرص….و خلي كل أب و أم جشعين يخيسوا ببضاعتهم…
تحياتي لكم…
أستغفر الله العظيم و أتوب إليه….
أعجبني
:)
على
أيوة يا وسيم عليهم يا وسيم
اذهب واحنا وراك “مو وراك ملصقين ، يعني شوية وراك ” ولئن خضت بحيرة الأربعين لخضناها معاك وليعنس العانسون “صورة ناس تقول اللــــه أكبر”
على فكرة ، حكاية القوانين ذكرتني بمقولة عظيمة من كوبوي بيبوب :
we’re supposed to live by following this world’s rules
but who made those rules ?
it’s not like we were born to obey somebody
ما أقول إلا ..
يا ليت قومي يعلمون!!!!
انت بطللللل
وانت عارف مضبوط انه دي وجهة نظري بالضبط ..
اكتر واحد جالس يشتكي وينوح من الموضوع ده انا ، حتى انت كنت تتريق عليا من كتر ما اجيب دي الهرجة
فاكر هرجة “واحد وتلاتين” ؟
اجل تبينا نعرس بـ 2000 ريال الله يصلحك؟
وسيم عزيزي… أنت لا تفهم عقلية المرأة السعودية و يمكن غير مدرك أو متناسي لما يحدث في المجتمع الزوجي السعودي.. و تفكر بمثالية زائدة
أنا راح اقولك من منطلق خبرة في دراسة الشخصية القومية السعودية و نظرة المجتمع السعودي للمرأة
أولاً سالفة انك تقارن بين أي امرأة >> لاحظ حتى ما قلت أجنبية
و بين المرأة السعودية فأنت غلطان كثير مع احترامي لك
سوزي يا عزيزي ما ان يتبادر إلى زوجها فكرة “ضربها” – طبعاً لسبب أو بدون سبب فبامكانها تاخذ حقها منه عساه كان من كان و ولد من يكون
تقدر المرأة السعودية تعمل كذا؟
سوزي بس تطلب الطلاق من زوجها راح تدار جلسات بالمحكمة و يتم التفصيل في اسباب الطلاق و التحدث مع كل من الطرفين أو من ينوب عنهما و ذكر كافة التفاصيل و لو طلبت سوزي قرار بمنع عدنان من الاقتراب منها طيلة وقت البت في القضية لحصلت عليه. و بعض القوانين و خصوصاً المتعلقة بالحسابات البنكية المشتركة للزوجين تضمن لسوزي الحصول على نصف ثروة الزوج و نفقة للأولاد و زيارات و إلخ
تقدر المرأة السعودية تعمل كذا؟
تذكر قصة ايميل مصنع البيبسي؟ و اللي عاير الزوج فيها زوجته لأن مهرها ريال = قوطي بيبسي؟
و انت تقولنا اعرسن بـ 2000 ريال؟
كل ما زاد مهر المرأة زاد قدرها في المجتمع السعودي لأن الرجل السعودي في الغالب يعتبر المرأة سلعة و شاريها بالمهر… كيف يتخلي عن سلعة كلفته الشيء الكثير؟ بينما لو كان مفي مهر و تكاليف العرس ما تتجاوز الألفين ريال مثلاً بتلاقيه ماخذ السالفة لعبة… يعرس على بنت الناس اليوم و بكرا يطلقها
لا و يمكن بأول هوشة الأم تقوله -خصوصاً لو كانت موب راضية باختياره: طلقها يا وليدي و بكرا نزوجك اللي احسن منها
نزوجك اللي احسن منها و هي باللي ما يحفظها خصوصاً انو مجتمعنا يحليله ما يتكلم عالمطلقة أبداً و يضعون الرجال بمرتبة الملائكة و حنا يالحريم حطب النار مثيرات المشاكل منغصات عيش اولاد الحمايل 
كذا ببساطة
و زين انك ما حطيت كل الذنب على البنت… ترا و الله في أهل ماخذين السالفة صفقة و بيع وشراء الله يصلحهم و يفك بنتهم من شرهم
و يا عزيزي ترا طحت من عيني لمن قارنت المرأة بالبلاي ستايشن
بس غيري بعدها لينة لطيفة تجرح احاسيسها ليش؟ 
و كأن المرأة شي تلعب فيه تتهنى و متى ما حبيت عملت له turn off
المشكلة اللي واقعين فيها انكم نسيتوا ان المرأة بشر مثلكم لها كيان و احاسيس… ترا و الله عيب انك تشبهنا ببلاي ستايشن و لو مزاحاً
أنا ما اخذت الموضوع بحساسية زايدة لأن ما شاء الله شبابنا السعودي موت الأحاسيس فيني
ايوه الرجال لازم يتعب عشان يتزوج و يحس بالمسؤولية اللي قدامه.. هذا بناءعائلة موب اي كلام… يتعب و يتعب بس يحسن الاختيار من البداية لا يتبهذل…
أنا ضد المهور المرتفعة و بظني 30 ألف جداً مناسبة و لو ارتفعت الأسعار المفروض تزيد بنفس النسبة… تراها كلها 30 ألف و بعض من النساء تصرفها كاملة و عليها زيادة في سبيل رضا زوجها… أجل الجهاز و الذهب و السوالف دي لمين؟ موب عشان تتزين لحضرته؟
وه بس وفقك الله يا بني
ياخي لو تحسبها تطلع خسرانه خسرانه لول
وسيم ……..رد الأخت Straycat صحيح مية في المية
سوزي لو طفشت من زوجها تديلو بالجزمة وتشوف غيرو وهو لو فكر بس يدعس على طرف ثوبها تلاقي الشرطة عند باب بيتو وسين وجيم……….
لكن بناتنا مين يضمن حقوقهم……..انا ما أرضاها على أختي ولا بنتي انها تتزوج بألفين ولا يكون زواجها في حوش البيت ……بينما زوجها أو أهلها قادرين يوفرولها أحسن من كدا
الميتين ألف هادي شبابنا مستعدين يدفعوها في سيارة لو دخلت مزاجهم………… ومستعدين يدفعوها في أربعة ولا خمسة سفريات.
والمهر هدا لو سألت آغلب المتزوجات حتلاقيه رجع للزوج بطريقة أو بأخرى ( مش لازم نفصل)
والشبكة والعربية والحاجات التانية كلها راح تكون في بيتك ماهي في بيت ناس ثانين
عالعموم صدقني بكرة النهار راح تتغير نظرتك
والواحد لو خلى نيتو في الزواج هي العبادة واكمال نصف الدين والله كل الأمور راح تتسهل
الأخت الكريمة straycat / بأعلق على ردك من عدة نقاط..
الأول / إنك اتكلمتي عن سالفة الضرب في سالفة الغلاء ، وبالرغم من إني مني شايف رابط بينهم لكن أقولك .. الغلاء موجود الآن .. والضرب موجود الآن .. وأنتي قايلتها بعظمة كيبوردك .. إحنا بنشوف ونسمع عن حوادث الضرب الآن في ظل مهور قدرها 100 ألف .. فهل الغلاء منع الضرب ؟
لا !
يعني حتى لو افترضنا إنه في رابط بين الاثنين.. فالرجل رح يعتبر المرأة عبدته إذا دفع فيها دم ماله ، ورح ينز عليها ويضربها إذا غلطت أقل غلط .. وهدي حقيقة مسلم بيها مش نظرية أو تفكير مثالي زائد !!!
سالفة البيبسي / ولو إني ما سمعت بيها ..ولا أعرف متى كانت .. وايش الظروف المحيطة بيها .. لكن اسمحي لي أقول إنها سالفة تهريجية من البداية وحالة شاذة والشاذ لا يؤخذ كقاعدة ..
في حين إني أتفق معاكي في سالفة إنه 2000 ككل تخلي مسألة الزواج لعبة “في المجتمع السعودي” .. أوكي لا تخلوها ألفين .. لكن خلوها رقم معقول .. أظنك شفتي الرقم الي حطه السيد وسيم تكلفة للزواج .. والرقم بالفعل موجود ومش مبالغ فيه .. ولو كنتي شاب ..مثلنا .. دوبك متخرجة .. رح تعرفي إنه مجرد التفكير في الرقم رح يخلكي إما تهوني عن التفكير في الزواج واشتراء سيارة لكزس أحسنلك << قصة حقيقية حصلت قبل أسبوعين ! وإما إنك تروحي تعربدي في بلاد ما وراء جيزان بسعر رخيص .. وهدا أيضا بنشوفه كتير …
أعطونا رقم معقول !!! ما قلنا لكم بيبسي ولا بايسون ولا حتى ريد بول !!!!
نقطة تانية ، تصب في نفس هدي النقطة .. ترى الأمر هدا والله مش في مصلحتكم (الي هو : غلاء الأسعار يخلي الرجل ما يطلق المرأة ) .. فالبفعل هو ما رح يقدر يطلقها .. لكن رح يعيش معاها حياة كلها جحيم حتى ربنا يفتح عليه ويجمع 200000 مرة تانية ويتزوج عليها … و (ها ها ) !!!! ناظري حولك وبتشوفي العجب العجاب من القصص من هذا النوع ..
أما النقطة الأخيرة ، فمستر وسيم ما شبهكم بالبلاي ستشين على فكرة .. مستر وسيم في رأيه إنكم أرفع من كدا .. لكن التفكير العقيم الي يفكروا فيه العوائل يجعل من بناتهم بلاي سيتشين .. أقرأي رده مرة تانية بتركيز ورح تشوفي إنك أساءت الظن بيه !!!
دمتم بود
أولاً أحييك على هذا الموضوع الراقي.. و لي بضعة إضافات:
لا تظن بأن الأب هو دائماً المسؤول عن زيجات غالية كهذه.. لو كان بيده, لأنقص التكاليف إلى شيء أقل مما نراه الآن.. لأنه يدفعها من جيبه.
الأم هي المشكلة هنا, لأنها دائماً ما تحاول إرضاء الناس عنها..
هذا الكلام الذي دائماً ما أقوله للأهل في تلميحات مستمرة.. لكن لا حياة لمن تنادي.
—————-
و للإجابة على straycat: لماذا يتم ربط الزواج الناجح و الاختيار الجيد للزوجة بالتكاليف المادية ؟ هذا هو السؤال الذي إذا لم يجب عليه فربما سنرى عوانس أكثر في المستقبل.
تمنيت انك قدامي حتى اصرخ بملء فمي “اتكيــــــــله!”
يبدولي انه طفح الكيل يبوالوس
“و الله اللي تختصر عمرها كله في ليلة وحدة هذي إنسانة أنا شخصيا مالي لزمة بيها و لا أبغاها….”
ارفع القبعة (مع اني ما البسها) احتراما لهذي العبارة…لكن هناك الكثير من هبل البنات يوم الزواج وكنصيحة من بعض اخواني المتزوجين “غمض عيونك عشان المركب تمشي” وان كنت شخصيا غير مقتنع بيها.
المشكلة اننا في مرحلة انتقالية بين جيل طفره(كناية عن الزيادة) وجيل طفره(كناية عن عدم وجود المال) وبعض الناس متخيل ان بنته سندريلا ومستني الامير الفارس ياخذها.
والادهى من ذلك عقلية بعض البنات الي تستنى هذي الليلة حتى تقهر صاحباتها وتهايط على باقي البنات بان زواجها احسن من زواجاتهم وانها تسوى كذا وكذا ولا ماكان الدلخ (الزوج) صرف عليها….تلحّفي يا اختاه!
الواقع راح يتكلم في النهاية والانحراف اللي بدا يسود المجتمع هو احد العلامات.
تدوينة جيدة ونابعة من القلب….احسنت
إلى كل شاب…إذا انت مقتنع بكلامي ترى ما في شي يحدك على البهدلة هذي كلها….العالم واسع و كبير و مليان بالفرص….و خلي كل أب و أم جشعين يخيسوا ببضاعتهم…
—————
سمعنا وأطعنا .. ينصر دينك ياوسيم
وس وس .. خش عليه
وس وس اسم الله عليه :lo:
أهنيك على هذه التدوينة اللي خلتني أقول : الله أكـــبر
واحد من الشباب ينصحك :
دامك ما تبغى هذه البهذلة ، تزوج من برى أحسن لك !!
و أنا شخصياً أتفق معاه ، و الله من حلاوة أغلب السعوديات – مع احترامي
الله يعين
صح لسانك على هالدرر
ومعاك معاك ياوسيم
وياليت أنك تكلمت عن (مسخرة) التصريح بالزواج من الخارج، يعني اللي مو قادر يتزوج من الداخل وماله غير الزواج من (الخارج) يمنعونه ويحطون له العراقيل، وحتى لو كانت هالفتاة من الخارج عربية ومسلمة.
المشكله بعد كل هذا يقولون ليه الشباب ينحرف ؟!!
والله من جد ، نحن مانبغا نتزوج من الداخل!! تصريح!! ايش هوه الزواج بالقوة!!
اعلق وأصفق
تراني كلمت الأسعاف والمطافي عشان يجوا لأني حاس ان الوضع ملغم وقرب ينفجر
خلينا نفصفص الموضوع حبه حبه
أنتا كيف تبي تتزوج البنت بثلاثين الف بس ؟؟؟
اذا جلست مع صاحباتها وتبي تتفشخر ايش راح تقول ؟؟؟
يعني تبغاها تتفشل وتقول اني تزوجت بثلاثين الف بس >>> عيباه وش الكلام هذا
ثانياً
لو سلمنا أمرنا لله وقلنا هاذي الميتين الف ودفعناها كم راح تكون مدة الضمان
يعني اتزوج البنت وبعد ماتجيب البزر الاول تصبح بالوناً>> متعوب عليها
وش الفايده ؟؟؟؟
ثالثاً:
والله ما أدري ابي أنام راح ارد مره ثانيه وأكب كل الأفكار اللي عندي
.
صراحة ياوسيم عوده قويه جداً جداً جداً
اهنيك عليها
الله يستر لا تجي بنت وتهكر المدونه :-x
ولخلق التوازن ،
لا تعترضون اذا جو بناتنا وقالو نبي نتزوج أجنبي !
موضوع في الصميم !
وانا اتفق معك بكل كلمة قلتها.. للأسف ان صار عندنا نشوف اللي أعلى مننا ما نشوف مين هم أقل مننا .. هذي الحقيقة ..
الشغلة الثانيه، التربية اللي جالسه تتغير مع تغير الوقت هذا، كل ما ارتفعت الأسعار وتدهور الوضع الاقتصادي التربية تتغير على أساسها، والله اتكلم جد !
أقارب لي، من بعد ما كانوا هم المتواضعين صاروا ناس ما تهتم الا بالشكليات وبس! فين صار الزواج وكم قيمة الشبكة وغيره من الكلام المادي البحت..
الناس صار همها “ماديات” وبس! نسوا التواضع ونسوا الناس الفقراء اللي ما تقدر تمسك راتب شهر لنهاية أول أسبوع من شهر الصرف.. (أقصد الشباب وأقصد الفقراء، كلهم يمرون بنفس الظروف الصعبه، صح والا لا؟)
صاروا يشوفون الزواج وناسه و”هياط” و”فشخره” وكل وحده تجي تستعرض فستانها من أي ديرة ومن شغل أي مصمم
التفكير أصبح جداً جداً جداً تافه !
اللي يضحكني أكثر، إن أكثر من بنت شفتها وسمعتها تقول “ما أبغى حفل زواج ولا مصاريف كثير، عشان يتيسر زواجي ويوفقني ربي معه” وبعد فترة اشوفها مسويه زواج وأسمع أهلها يقولون “مجنونة تبغى تطلع من غير فرح” !!! ليه مجنونه؟
مجرد التفكير بس إن الناس اللي تحضر زواج فيه غناء وأنا راح أشيل ذنوبهم يرفع ضغطي.. فرحي واطلع منه بذنوب؟؟ سبحان الله
ادري طولت بالكلام، في النهاية كل اللي اقوله، الأهل يسألون عن الولد وبس، والبنت ترد بالموافقه من عدمها وبعدين الاثنين يصطفلووووووو
هم يخططون بداية حياتهم بأنفسهم.. (طبعاً هذا اذا كانت البنت ذكية عاقله فاهمه ومتواضعه وقنوعه) .. الله يهديهم ويصلحهم
في الختام، القناعة كنزُ لا يَفنى …
الخطأ لا يقع على الأم والأب فقط! مش كل أم وأب مسؤولين عن تفكير بناتهم الغبي
ولا كل أم وأب يقدرون على بناتهم وهذي حقيقه، فيه بنات يمشون كلمتهم على كلام أهلهم
الخطأ واللوم كله يقع على البنت اولاً واخيراً سواء كان الكلام كلامها او كان السبب رضاها بكلام غيرها.. لو هي تبغى الستر بس بتقدر تتكلم وما تخاف وربي معها لأنها تبحث عن ستر مو عن لعبة يسمونها زواج..
لا تعمم وتقول كل أم وأب، البنت الملومه أحياناً وليس أهلها
صح كلامك يا ابو الوس
بس في اهالي اهم شي عندهم راي الناس يقولو خزوة ايش يقولو الناس عننا مايفكرو في الولد من فين يجيب من فين يحوش بس لمن يزوجو ولدهم وبنت الناس لمن تطلب ديكا الساعه يحسو بقيمة الفلوس .
وحكاية المهر احسها كان البنت سلعة تنعرض للبيع ليش يحسسو البنت رخيصة لدي الدرجة بس مو كل العوائل تطلب مهر .
اتمنى مدونتك الامهات يقرؤها .
تسلم يدك على المدونة
تساؤلات ..
ليه الولد السعودي مو طايق البنت السعودية و البنت السعودية مو طايقه الولد السعودي؟؟
ليه الولد السعودي يبغا يتزوج من أجنبيه و البنت السعودية تبغا تتزوج من أجنبي!!
للدرجة دي قافله معانا! ياناس نحن سعوديين! فين الاخلاق السعودية!
بوووستك يفطس من الضحك وعلى الصبح يعني الواحد يقرأ زي هالموضوع مرة فلة
شوف انا اول مرة ازور مدونتك وشكلي بضيفك بالريدر لانك تتكلم بالمنطق
بس انا حابة اقولك مين يدفع مهر 30 الف ، المهر لا يقل عن 45 الف وبصراحة الناس تعطي 50 الف وما فوق [ ياليت تراجع حساباتك صح ] >> ناوية تنطرد من المدونة
- انا معاك في مبالغه كبيرة في الطلبات من بعض الاهالي الله يسامحهم ولا يهتمون للولد اهم شئ يعطي ويعطي على شان يجلسون ويقولون في المجالس والله بنتنا خذت مهر 100 الف
المشكلة الحياة صايرة غالية والشاب بالصعب يتوظف واذا توظف الراتب مابيكون والله 10 الف ..
بس ياليت لو كل ام واب يفكرون هل يقبلون بشاب عديم الاخلاق وبيعطيهم كل طلباتهم وتعيش بنتهم معاه في تعاسة ومشاكل زوجية ، أو شاب ذات اخلاق ودين ولكنه ميسور الحال [ هل نشتري الولد او فلوسة ] ؟؟
هذي المشكلة والله الكل يشتكي منها لدرجة الناس صاروا مايقدرون يروحون بيت احد غريب يخطبون يخافون من الطلبات [ مثلا ناس تطلب الورد يجي من باريس يوم العرس ]
وعلى شان ارد على اول سطر في تدوينتك
اقولك تفضل :
http://www.mblog.ws/?p=2266
ينصر دينك يا وسيم،
وأعتقد ان حديث الرسول-عليه الصلاة والسلام-
“خير النساء، أيسرهن مؤونة”
يختصر الكثير من الكلام ووجع الراس…لكن من يفهم!!؟
بسم الله ماشاء الله
أشكركم جميعا عل آرائكم و تعليقاتكم و ماراح أكسف أحد فيكم و حرد عليكم كلكم
أبا سند: Right on brother!
و يجي يجي كاوبوي بيبوب
ريكوايم فور أ دريم: ياخي اكتب بإسمك الحقيقي و ريحنا لازم تغلبنا معاك يعني
….بس هرجة “31″ شكلها كذا تنادي
هههههههههه انت حتقولي داك اليوم شوية و تنجلط
نشوفك قريب يا كابتن و بالتوفيق في الوظيفة الجديدة
stray cat:
أشكرك كل الشكر على الرد اللي حنبسط و انا أرد عليه….بس باين من كثر استخدامك لخوينا الرجل الأخضر ان الضغط عندك و قت ما كتبتي الرد كان مليون
طيب…خلينا نبدأ…هل تعليقات الزوار اللي ردت عليكي كفاية و لا أرد عليكي أنا كمان؟
مو مشكلة….خليني أرد عليكي أنا…
أول شي قلتي:”اجل تبينا نعرس بـ 2000 ريال الله يصلحك؟”
و انتي يا “تطخه يا تكسر مخه”؟ تركتي الحكمة من القصة و هي بساطة التجهيزات للحفل و ركزتي على الـ2000؟ لا يا شيخة ما قلت تزوجوا بـ2000 لكن ما أرضى بالهبل اللي صاير دحين بحجة “العادات و التقاليد”
ثاني شي قلتي: “وسيم عزيزي… أنت لا تفهم عقلية المرأة السعودية و يمكن غير مدرك أو متناسي لما يحدث في المجتمع الزوجي السعودي.. و تفكر بمثالية زائدة
أنا راح اقولك من منطلق خبرة في دراسة الشخصية القومية السعودية و نظرة المجتمع السعودي للمرأة
أولاً سالفة انك تقارن بين أي امرأة >> لاحظ حتى ما قلت أجنبية
و بين المرأة السعودية فأنت غلطان كثير مع احترامي لك
سوزي يا عزيزي ما ان يتبادر إلى زوجها فكرة “ضربها” – طبعاً لسبب أو بدون سبب فبامكانها تاخذ حقها منه عساه كان من كان و ولد من يكون
تقدر المرأة السعودية تعمل كذا؟
سوزي بس تطلب الطلاق من زوجها راح تدار جلسات بالمحكمة و يتم التفصيل في اسباب الطلاق و التحدث مع كل من الطرفين أو من ينوب عنهما و ذكر كافة التفاصيل و لو طلبت سوزي قرار بمنع عدنان من الاقتراب منها طيلة وقت البت في القضية لحصلت عليه. و بعض القوانين و خصوصاً المتعلقة بالحسابات البنكية المشتركة للزوجين تضمن لسوزي الحصول على نصف ثروة الزوج و نفقة للأولاد و زيارات و إلخ
“
تقدر المرأة السعودية تعمل كذا؟
كل هذا الكلام اللي فوق ماله دخل في موضوعنا خير شر….ايش دخل الضرب و الحسابات المشتركة في تكاليف الزواج المرتفعة؟….لا تشبكي الخطوط ببعضها
و بعدين….السعوديين بشر زيهم زي غيرهم….ما يفرقنا عن غيرنا أي شيء….كلنا أولاد تسعة و كلنا أولاد آدم و حوا…و مافي شي يميز المرأة السعودية عن غيرها…
عموما…اللي فهمته من كلامك هذا اللي فوق ان عادي مافي مشكلة تتبهدلي تتمرمطي تنضربي دام انك لعنتي خيره و قت الزواج و دفعتيه اللي وراه و قدامه….انتي عارفة هذا معناه ايه؟
يعني انك انزلتي نفسك من منزلة الإنسانية و تجاوزتي منزلة السلعة إلى منزلة العبودية…و من كلامك أدينك
يا عزيزتي….مسألة الفلوس و أخلاق الرجال مالها دخل أبدا ببعض…ما أدري من فين جبتوا الرابط العجيب هذا؟!
ثالثا: قلتي:”تذكر قصة ايميل مصنع البيبسي؟ و اللي عاير الزوج فيها زوجته لأن مهرها ريال = قوطي بيبسي؟”
أذكر القصة….بغض النظر عن صحتها بالله عليكي ايميل صار يتحكم في حياتك؟!
رابعا: قلتي “كل ما زاد مهر المرأة زاد قدرها في المجتمع السعودي لأن الرجل السعودي في الغالب يعتبر المرأة سلعة و شاريها بالمهر… كيف يتخلي عن سلعة كلفته الشيء الكثير؟ بينما لو كان مفي مهر و تكاليف العرس ما تتجاوز الألفين ريال مثلاً بتلاقيه ماخذ السالفة لعبة… يعرس على بنت الناس اليوم و بكرا يطلقها
”
و الله محد مخليكم سلعة الا انفسكم….عبدتوا المظاهر لدرجة انها صارت تتحكم في حياتكم….و برضه معلقة على الألفين ريال اللي يا ريتني ما ذكرتها
…..ارتاحي و الله و الله و الله ألفين ريال ما تكفي شي ارتاحي بس 
خامسا: قلتي “لا و يمكن بأول هوشة الأم تقوله -خصوصاً لو كانت موب راضية باختياره: طلقها يا وليدي و بكرا نزوجك اللي احسن منها
”
لو انه رجال ما يسويها…و لو انه ولد أمه يسويها حتى لو دفع مليون….أكرر لا تربطي الفلوس بالأخلاق….
سادسا: قلتي:”و يا عزيزي ترا طحت من عيني لمن قارنت المرأة بالبلاي ستايشن
بس غيري بعدها لينة لطيفة تجرح احاسيسها ليش؟ 
”
و كأن المرأة شي تلعب فيه تتهنى و متى ما حبيت عملت له turn off
المشكلة اللي واقعين فيها انكم نسيتوا ان المرأة بشر مثلكم لها كيان و احاسيس… ترا و الله عيب انك تشبهنا ببلاي ستايشن و لو مزاحاً
أنا ما اخذت الموضوع بحساسية زايدة لأن ما شاء الله شبابنا السعودي موت الأحاسيس فيني
أنا راح أمشي كلامك هذا بمزاجي لأنه واضح انك ما فهمتي قصدي…ياريت ترجعي تقرأي كلامي كويس
سابعا: قلتي:”ايوه الرجال لازم يتعب عشان يتزوج و يحس بالمسؤولية اللي قدامه.. هذا بناءعائلة موب اي كلام… يتعب و يتعب بس يحسن الاختيار من البداية لا يتبهذل…”
وقفت طويلا عند الجملة هذي اللي أثبتت لي انك لسه عظمك طري و غشيمة في الحياة ما تعرفي شي…
راح أتكلم عن المحيط اللي عشت فيه خمس سنين من حياتي: سكن الجامعة…شوفي يا بنتي…انتي لو حسيتي بواحد على مليون من العذاب النفسي اللي يمروا فيه الطلاب عشان يرجعوا لأهاليهم بشهادات ترفع رؤوسهم ما كنتي قلتي كلامك هذا….عشان كذا اعذريني يا أختي….مو انتي اللي تتكلمي عن البهدلة و التعب و تحمل المسؤولية…لو جلستي مع أي شاب على قد حاله و حسيتي بالمعاناة اللي يحس بيها عشان يعف نفسه ما كنتي قلتي كلامك هذا…
حتى أنا شايف ان 30 ألف كويسة لكن لا نقعد نضحك على بعض…انتي عارفة الحركات اللي يسووها الحريم في الزواجات و اللي غالبا من جيب المسكين…و هذي يبغالها تدوينة لحالها
اعذريني على قسوتي عليكي في الرد…لكني اعتبرك زي أختي الصغيرة و أبغاكي تتعلمي
تحياتي لكي
اللي بعده!
الجزء الأول من كلامك رديت عليه في ردي على stray cat
و بعدين خلي الشباب يحصلوا الميتين ألف و يصير خير
من جدك ياأخي و لا بتمزح؟
ميتين ألف إيه اللي شاب يجمعها من راتبه بدون مساعدة “بابي” أو “مامي”
لو واحد راتبه خمسة آلاف و يجمع كل شهر 2000 يبغالها 100 شهر يعني 8 سنين و اربعة شهور و انت طيب….
و رجعنا تاني للألفين؟ لا يبويا زوج أختك و بنتك زي ما تحب….
ياخي اذا انت مبسوط مو كل الناس زيك….لا تفكر ان العالم يدور حولك و يسبح بحمدك….احنا نتكلم عن قضية مجتمع….عن 60% من سكان المملكة..
و انا مصر تفصل كيف يرجع المهر للزوج…منتظرك…
و أنا عارف ان هذي الأشياء كلها حتكون في بيتي….لكن أنا اللي حتزوج و أبغى كل شي بمزاجي…مو بمزاج شلة حريم ما عندهم غير الفصفص و الحش في خلق الله و لا عمرهم تعبوا في قرش….
و الواحد حط نيته ما حط نيته في الزواج عندك هنا ناس تكرهك في الزواج و سنينه
تحياتي لك
اللي بعده!
حمدان: شكرا على المرور
اللي بعده!
أبا سند مرة ثانية: لا فض فوك و لله درك
اللي بعده!
حياك الله هشام…أنا ما ألوم الأب بس….ألوم الكل الأب الأم البنت حتى الشاب اللي يرضخ لطلباتهم…
تحياتي لك
اللي بعده!
يا رجال…سرينا على “البلاد” و تزوجنا من هناك….مافي شي جابرنا على البهدلة دي كلها…
اللي بعده!
مالها دخل بالحلاوة يا عزيزي….إن شاء الله لو كانت ملكة جمال الكون ليش الصرفيات دي كلها؟
اللي بعده!
هلا أخي ماشي صح نورت المدونة
غاب عن بالي تماما موضوع تعقيدات الزواج من الخارج…إن شاء الله في تدوينات لاحقة….
منتظرين اجتماعكم القادم
اللي بعده!
تنفلق هي و صاحباتها< <<<عرق الصياعة اشتغل
فاكرين الفلوس تجي بالساهل في الزمن دا
و يارجل يتهكر يتهكر ما عاد تفرق معايا اللي في راسي من سنين خلاص طلعته
و شكرا على التعليق
اللي بعده!
و ليش نعترض؟
تزوجي يا أختي اللي تبغيه الله يهنيكي و يسعدك :-)
يا سلام….درر و الله درر :-)
و الله الدنيا تصير بخير لو كل البنات زيك….
عارفة…الموضوع علمني شي فيكم يا بنات….
ما تفهموا الكلام زي ما هو….تفهموه زي ما عقلكم يقول لكم تفهموه
أنا قلت “كل أب و أم جشعين” مو “كل أب و أم”
تحياتي لكي
اللي بعده!
دحين هي “غزوة” و لا “خزوة”؟
و كلامك مية مية…ياريت كل البنات زيك كمان
تحياتي إلك
اللي بعده!
الشغلة مو شغلة كره…بنت البلد بتتعب ابن بلدها قرر يتزوج من برة…فهي من باب العناد و الغيرة بترد له نفس المشاعر..و بس
تحياتي لك
اللي بعده!
حياك الله أختي
عندنا في الحجاز المهور 25 30 غالبا….المشكلة مو في المهر….في سخافات الحريم…زي الورد من باريس مثلا…
و حتى لو الراتب 10 آلاف مو معناه انه ينصاع للسخافات هذي….معظم الشباب اللي ردوا هنا يا دكاترة يا مهندسين يعني ميسورة…المسألة مسألة مبدأ..
و تدوينتك قريتها و أتفق في أغلب ما فيها لكن أختلف في مسألة العادات و التقاليد….احنا كشباب لازم ننسف العادات و التقاليد هذي نسف!
تحياتي لكي
شكرا لكم جميعا
وسيم اول شي انا قبل ما ابدأ انا معاك في نقاط كثيرة (رغم اني بنت) لكن مختلفة في شوية اشياء ..
اول شي سوزي هدي اللي تقول عنها >> تلاقيها خرجت مع عدنان ويمكن نامت معاه عشرين مرة قبل لا تتزوج ،، لا وابشرك مو بس هو يمكن غيره كمان
في المقابل لما تجي انت تاخذ بنت بلدك راح تاخدها نظيفة ولك لوحدك وماتصير حليلتك الا بعد ما تعقد عليها (طبعا بغض النظر عن فئة المنحرفة من البنات) !!
ثاني شي،، للاسف الرجل السعودي اللي حيتزوج وحدة بـ 2000 ،، بعد فترة حيتزوج اثنين وثلاثة واربعة >> هذا اذا ما طلق واخذ غيرها طالما العروسة رخيصة كدة صح ولا لا !!! ومافي شي يحميها لانو بكل بساطة التحايل عندنا والبهدلة على الحرمة تصير بكل بساطة
في المقابل سوزي لما يفكر عدنان يطلقها >> حيتبهدل هو في المحاكم اكثر منها عشان كدة ماراح يطلقها بسهولة
ثالث شي ،، زي ما المرأة السعودية على قولك تطلب طلبات كثيرة ومكلفة >> الرجل السعودي كمان لما يبغى يتزوج يحط مواصفات ولا مواصفات الملايكة خخخ بيضا ، شقرا ، عيونها ، جسمها ، شعرها ، رجولها ولو صار نصيبه مع وحدة مو على مواصفاته يخلي الموضوع في باله ويفضل دايما يشوف مرته اقل من المستوى اللي هو نفسه فيه وتفضل عينه زايغة عالرايحة والجاية ووقتها تتدبر الفلوس كلها عشان يتزوج او يقابل اللي عجبته !!!
وسيم ،، انا ضد غلاء المهور والتكلف في الزواجات
لكن كمان اذا انتو معشر الرجال تبغو المرأة تقدر وضعكم ،، اتنازلوا عن شروطكم الملائكية اللي تخلي العيون فارغة ومايعجبها العجب !! عشان المرأة لما تقبل تتزوج باقل تكلفة تحس انها في امان مو كلها فترة ويروح منها الامان !!
المرأة ياوسيم اذا حست من الطرف الثاني انو شاريها وحيآمن عليها طول عمره صدقني محتطالع في فلوس ولا ناس ولا شي .. المرأة كلها شي واحد (قلب) يحكم مشاعرها وتصرفاتها ..
واعذرني عالاطالة
وسيم أول شي أنا كنت قاعد أعد حلقة جديدة عن هذا الموضوع :-) لكن يبدو أنو حـ أجله شويا
وأحب أقول
إذا ماانصاع المجتمع المتناقض هذا للمتغيرات وصار أكثر وعياً
فاالله لايرده
المشكلة دايماً يتغنون بـ”الله لايغير علينا”
طيب ياسادة “الله لايغير عليكم”
وبعد إذنك أحب أعقب على رد الأخت odah
تفضلتي وقلتِ :
هنا جينا لتناقض المجتمع ياأختي الكريمة!
أقصد يعني إذا وجد الشاب مايبحث عنه فسيبذل كل غالي من أجلها “وراح يخلي الغالي يرخصلها” ( وطبعاً الغالي موغلاء مجتمعنا الزايد أبداً!)
لكن الواقع يقول
ماأنكر أنو فيه بنات فيهم صفات رااائعة , لكن عادات المجتمع الغبية صعبت الطريق إليهن وخلته غامض واتبعنا الطريقة التقليدية!
هذا تعقيبي لكِ أختي.
وأحب أقول لكل شاب تستطيع أن تجد فتيات كثيرات يحملن كثير من الصفات اللي تتمناها وبشكل ميسور جداً ولكن ليس في مجتمعنا السعودي إلا قليل منهن
في بعض الدول العربية والإسلامية الأخرى “على قفا من يشيل” !
تحياتي
معليش عزيزي عبد الرحمن نسيت أرد عليك مع الزحمة هذي كلها
يا رجال انت في زمن العادات و التقاليد….قال الله و قال الرسول قليل اللي يطبقها هذي الأيام….
دمت بود…
Odah
قلتي:
“وسيم اول شي انا قبل ما ابدأ انا معاك في نقاط كثيرة (رغم اني بنت) لكن مختلفة في شوية اشياء ..
اول شي سوزي هدي اللي تقول عنها >> تلاقيها خرجت مع عدنان ويمكن نامت معاه عشرين مرة قبل لا تتزوج ،، لا وابشرك مو بس هو يمكن غيره كمان”
تصحيحا لمعلوماتك….سوزي عاشت مع عدنان 12 سنة قبل لا يتزوجوا…يعني أكثر من 20 مرة….و مع ذلك…ذكرك لهذي النقطة ماله أي علاقة بالفكرة اللي أبغى أوصلها…بس حلوة تبشريني تصدقي ما كنت أدري؟؟ كويس انك نورتيني
بعدين قلتي”
“في المقابل لما تجي انت تاخذ بنت بلدك راح تاخدها نظيفة ولك لوحدك وماتصير حليلتك الا بعد ما تعقد عليها (طبعا بغض النظر عن فئة المنحرفة من البنات) !!”
و الله العظيم أحس نفسي قاعد في معرض سيارات…ايش نظيفة و ليا لوحدي و محد استعملها غيري؟ قاعد أشتري سيارة أنا؟
يا أختي العزيزة….كلامك هذا و كلام اللي قبلك أكبر دليل انكم خليتوا أنفسكم سلعة و قاعدين تكابروا… ايش دخل شرف البنت بالتكاليف الغالية؟
و حلوة “بنت بلدك” هذي….يعني أي بنت غير سعودية مشكوك في شرفها؟
مشكلتكم انكم تبغوا تبدئوا من القمة…و هذا يخالف أبسط قوانين الحياة…كل شي يبدأ من الصفر و حبة حبة يكبر…الا عندنا!
بعدين قلتي:
“ثاني شي،، للاسف الرجل السعودي اللي حيتزوج وحدة بـ 2000 ،، بعد فترة حيتزوج اثنين وثلاثة واربعة >> هذا اذا ما طلق واخذ غيرها طالما العروسة رخيصة كدة صح ولا لا !!! ومافي شي يحميها لانو بكل بساطة التحايل عندنا والبهدلة على الحرمة تصير بكل بساطة
في المقابل سوزي لما يفكر عدنان يطلقها >> حيتبهدل هو في المحاكم اكثر منها عشان كدة ماراح يطلقها بسهولة”
واضح جدا انك ما قرأتي ردودي على اللي قبلك….عموما برضه بتأكدي لي انكم خليتوا أنفسكم سلعة…
و يتزوج اثنين و ثلاثة و اربعة….حقه الشرعي….و الحرمة ما تتطلق كذا من الباب للطاقة….اذا استحالت العيشة بينهم خلاص كل واحد يروح في سبيله…
يا عالم ايش الذل اللي عايشين فيه؟….بالله كيف ترضي تعيشي مع واحد مو طايقك و مخليكي على ذمته عشان دفع فيكي دم قلبه؟…
و الحياة علمتني شي….الزواج قسمة و نصيب…و الواحد مهما تشرط تجيه اللي تملى عينه حتى لو كانت مهي حلوة….انتو اللي معيشين أنفسكم في هذا الوهم…
لكل المعارضين: لا زال سؤالي قائم و لا أحد جاوب عليه: ايش اللي يحدني اني ادفع على وحدة ما أعرفها شقى عمري؟ يارب أحد يقنعني…
تحياتي لكم
لكل المعارضين: لا زال سؤالي قائم و لا أحد جاوب عليه: ايش اللي يحدني اني ادفع على وحدة ما أعرفها شقى عمري؟
…..
تدفع عليها شقى عمرك .. ماأتوقع إنك بتخطب وحده وعلى الأقل مابتكون تعرف شي عن أهلها وإلا أحد من قرايبها ..
لو مثلاً بتتزوج وحده عن حب ماأتوقع إنك مابتكون عرفتها لمده كافيه كانت كفيله تخليك تعرف هل أصلها طيب أو لا وهل تستاهل إنك تدفع عليها شقى عمرك أو لا ..
…
وماتوقع راح تقبل على أختك لو كان عندك أخت مثلا إن أحد يجي يخطبها وهو مو مستعد يكلف نفسه عليها ..
تدري ليش ؟؟ بحجة إنه مايعرفها فليش يكلف نفسه ويدفع شقى عمره !!
…
وهلكتونا ياشباب بكلامكم اللي لو مالقيتو بتتزوجو من بره .. صدقوني الطريق واسع ومفتوح ..
تزوجو اللي تبغوها واللي تعجبكم .. بس في المقابل ايش اللي يضمنكم إنها تستاهل تشقى عليها وإلا تكمل حياتك معاها ..
بطلو فلسفه .. ماقلنا ادفعو مهر ملوك ..
بس ادفعو شي معقول ويكفيها لإن مافي أحلى من البساطه وعدم التكلف ..
لإن ماأتوقع إن في عاده جديده إن مثلا الأب يجهز لبنته على حسابه !!
اتعبو شويه كل حياتكم تبغوها راحه في راحه وشروط في شروط ..
وتبغو المرأه عبده تطيع أوامركم ..
…
وبعدين بطلو من كلمة عانس هذا هو اللي نبغاه من المجتمع من تتعدى البنت السن نظرو لها بنظره كأنها من عالم ثاني
مو كل شي مرتبط بالرجال وإلا لو مانخطبت وماتزوجت إنها ولاشي ..
مجتمعنا اللي خلانا بحاجة الرجال
وإلا صدقني المرأه أذكى وأنفع من الرجال بمليون مره .. وكل واحد يقدر يصنع نفسه بنفسه ..
بس للأسف ..
بتظل نظرة المجتمع والرجال عقيمة ..
……..
الأخت ميُّوتهْ /
لا مؤاخذة لكن أنتي يظهر إنك لا قرأتي الموضوع ولا الردود .. وإن كنتي قرأتيهم فمنتي فاهمتهم .. وإن كنتي فهمتيهم ففهمتيهم زي ما تبغي أنتي مو زي ما قصد الكاتب ولا الأعضاء الكرام (ودليل قولي أول سطر من ردك
)
ثمن يقولوا … أذكى من الرجال .. وبمليون مرة
!!!
يالله الحور العين ..
يالله الحور العين !!!
..
أبي سند ..
للأسف تركت الفهم لأمثالك ..
وماذكرت إن السؤال من ردي أبداً !!!
بس نسيت و ماعملت لها اقتباس يعني لهذي الدرجه ماربطت وفهمت !؟
امممم
للأسف مافي مجال للمحاوره هنا .. لإنها من بدايتها باينه إنها عقيمه ..
المحترمة ميُّوتهْ /
شفيكي زعلتي
؟
أنا عارف إن السؤال اقتباس من رد الباش مهندس وسيم .. تراني قرأت الموضوع !!
أنا قصدت أول سطر من ردك “تدفع عليها شقى عمرك .. ماأتوقع إنك بتخطب وحده وعلى الأقل مابتكون تعرف شي عن أهلها وإلا أحد من قرايبها “
بعدين الله يهداكي شو ما في مجال للمحاورة ، وبدايتها عقيمة ، وهالكلام .. طيب اخصريكي مني .. المحاور الرئيسي الأستاذ وسيم .. إما يقنعك .. وإما تقنعيه وتقنعينا معاه ..
خلونا نخرج بشي من الموضوع …
لسموحة لو غلطناعليكي يا سيتي ، دون قصد واللهي *صورة واحد يقول دنا غلباااااااااااان*
وليش حارين أعماركم ياشباب ويابنات كل واحد يسوي الي في باله وكل واحد يعرف خلاصه
يعني ماله داعي كل واحد يبين أغلاط الثاني والمفروض مناقشتكم تكون أكثر واقعيه ويكون فيه احترام للآخرين ومو كل واحد قاعد لي مسخره على الثاني
أولا ماأحد يختلف على مسألة غلاء المهور الي موجوده عندنا في مجتمعنا وبمبالغه احيانا
بس ماننكر ان مع وجود هذي الحالات فيه بعد عائلات تبغي الستر لبناتها وفي بنات نفس الشيء مالهم أي طلبات تعجيزيه همهم الوحيد بس الرجل وإذا كانت اخلاقه عدله وبعد طلبهم يكون واقعي جدا ان الرجل
مكمل دراسته وعنده شهاده يعني بالعربي الفصيح انه شغال ويقدر يفتح بيت
بس بصراحه لاحظت بعد الردود هنا مالها دخل بالموضوع
زي واحد يقول بما معناه ياريت السعوديات جميلات وارجع اقول لك الموضوع ماله دخل بالجمال
واذا مو عاجبك السعوديات الطريق قدامك مفتوح طب وتخير في عندك العالم العربي مليان بنات
بس لا تنسى شيء مهم وهذا الشيء حاصل قدامي يعني لا أحد يقعد يقول ويفتي من عنده
كل البلدان العربيه في الوقت الحالي همهم لما يزوجوا بناتهم ان يأمنوا عليهم ومالهم ثقه بالرجل السعودي
لأن عندهم فكره مسبقه انه لعاب وماراح يحافظ على بنتهم
وتكون من ضمن المهر والشبكه والأمور الثانيه يشتري لها بيت في بلدها ويكتبه بإسمها بالاضافه لمصاريف الفرح وبعد مصاريف السفر كل سنه لبلدهايعني انتوا احسبوها
وبتقولوا البلدان الأجنبيه نفس الشيء ولا تأخذوا قصه سوزي كمثال لأنها حصلت زمان والحين البنات تغيروا
بإختصار شديد كل واحد يراجع نفسه قبل لا يقدم على خطوة الزواج لأنو مستحيل شيء قاعد يصير من عام ألف وخشبه يتغير الحين وبهذي الطريقه …. بس بامكان كل واحد يغيره لما يحصل له تراه مو اجباري فلا أحد يحر عمره
الي راضي يدفع على هبل والناس ترتاح وتستانس من فلوسه يدفع بكيفه والي مو راضي ماله داعي يتفق مع الي خاطبها ونهاية السالفه
للبنات بطلو طلبات تعجيزيه لأنها مو بمصلحتكم وماهي مقياس أبدا اذا كان الشاب عدل أو لا اذا نفذها لكم … كبروا عقولكم لأنوا الزواج مو بس ليلة الزفاف والحفله والطقطقه وبعدها خلاص لا انتوا داخلين على
مسؤوليه
للشباب كونوا على خلق الرسول ورفقا بالقوارير وكل مكان فيه الزين والشين هنا أو برى الواحد عليه بس يحسن الاختيار…وللبعض كبروا عقولكم لأنو بصراحه في رجال أجسامهم قاعده تنمي وعقولهم لسى بمرحلة الطفوله
بس أحب أعقب على كاتب الموضوع وللجميع
سؤال قاعد يقطع مخي: بالله عليكم ايش اللي يحدني اني أدفع مبلغ زي كذا عشان وحدة لا أعرفها و لا تعرفني…راس مال المعرفة بيننا شهرين ثلاثة بالكثير؟….من جد يا جماعة نوروني يمكن في حاجة غايبة عني…
ومنو قال لك المعرفه تكون بس هذي الفتره البسيطه …معروف في علم النفس المفروض تكون المده أطول بسبب ان كلا الطرفين في البدايه يجامل أو يتصنع أو يكذب وماتبان الشخصيه الأصليه الا بعد فتره على الأقل تكون سته أشهر وبعدها الخطبه ويكون فيه تعارف في فترة مابعد الخطبه اذا صلحوا للزواج صلحوا ماصلحوا كل واحد يشوف مصلحته
يعني من بدل مابعض العائلات تغلي وتبالغ في المهور يأخذوا جزء من هذي الفلوس ويدفعوها عشان حضور دورات تثقيفيه لكلا الطرفين
ولا أحد يقول لي قاعده أبالغ أو الموضوع مايستاهل لأنو هذا زواج مو لعبه
في النهايه بالتوفيق للجميع الخاطبين …. و للي ناويين يخطبون وللعزابيه
وقائع حصلت:
—————————-
“كان صداق رسول الله لأزواجه اثنتي عشرة أوقية ونشًّا ـ والنش: نصف أوقية ـ فتلك خمسمائة درهم فهذا صداق رسول الله لأزواجه”
“لما تزوّجَ عليٌّ فاطمة قال له رسول الله صلى الله عليه وسلم: “أعطها شيئًا”، قال: ما عندي، قال: «أين درعك الـحُـطَـمِيّة؟»” .. وتم بيع الدرع بـ 480 درهم
—————————-
نرجع للحاضر .. 480-500 درهم .. يعني تقريبا 2500 ريال سعودي
ليس الغرض من كتابة هذا الرد انو المهر يصير “2500″ ريال .. بس حلو الواحد يعرف =)
مابغى ادخل في النقاش .. بس لازم نعترف انو المسألة دخل فيها اجتماعيات بسببها صار في حد ادنى للمهر .. بس ما ينطبق على الكل أكيد
بالنسبة لي من وجهة نظري الشخصية جدا ( بمعنى لو كنت أب وبزوج بنتي ) .. اشوف انه 20 – 25 ألف ريال مهر مكافيء للوضع الحالي .. وتكاليف الزواج تكون مناصفة بين اهل العريس والعروسة -اذا كان اهل العروسة مقدورين- .. ( المهر لا يدخل في هذا ويكون كاملا للعروسة ) ..
تحياتي لك وسيم =)
اضافة للرد السابق:
بالنسبة للتكاليف .. الشغلة تحتاج تنازل شوية =)
بدل احسن قاعة .. نروح لقاعة متوسطة ( مو ننزل لأسوأ قاعة )
الشكليات بسهولة ممكن ما تنعمل .. احلى الملكات اللي شفتها اللي كانت بسيطة .. تحس بالبركة فيها =)
لو كان الشاب مقدور .. أو أهل العروسة مقدورين .. فالله يهنيكم بالزواج اللي تتمنوه -بدون اسراف زائد- .. لكن للي ما يقدر مافي داعي للتكلف فوق الاستطاعة ..
لا ننسى الهدف من الزواج يا جماعة .. انشاء بيت وحفظ للشاب والبنت .. يعني اللي يتزوج في اكبر قاعة واللي يتزوج في بيت صغير .. بالاخير كلهم نفس الشي .. والله يسعد ويهني ويبارك للاثنين ..
كلام رزين وعاقل
الله يوفقك ياوسوس
أهلا فؤاد
معليش تأخرت عليك بالرد….كسل بعيد عنك….
أشكر لك ردك على الأخت Odah اللي أتمنى انها تغير رأيها…
و منتظر تدوينتك
نجي للمشاغبين ميوتة و أبو سند….أقعدوا عاقلين أحسن لكم تر ما في حلاوة بعدين….
و ندخل في الجد
قلتي يا ميوتة: “تدفع عليها شقى عمرك .. ماأتوقع إنك بتخطب وحده وعلى الأقل مابتكون تعرف شي عن أهلها وإلا أحد من قرايبها ..
لو مثلاً بتتزوج وحده عن حب ماأتوقع إنك مابتكون عرفتها لمده كافيه كانت كفيله تخليك تعرف هل أصلها طيب أو لا وهل تستاهل إنك تدفع عليها شقى عمرك أو لا ..”
و حتى لو عرفت أهلها و لا أحد من قرايبها…أنا لا راح أتزوج أهلها و لا قرايبها…أنا حتزوجها هي….و الزواج دام انه “عمياني” فمسألة إني أصرف فيه فلوس كثير أعتبره “مقامرة” غير مأمونة العواقب…
و قلتي
“وماتوقع راح تقبل على أختك لو كان عندك أخت مثلا إن أحد يجي يخطبها وهو مو مستعد يكلف نفسه عليها ..
تدري ليش ؟؟ بحجة إنه مايعرفها فليش يكلف نفسه ويدفع شقى عمره !!”
إلا حأقبل و نص….لو أنا ولي أمر أخواتي و الله ما راح أكلف على اللي يتقدموا لهم….الفلوس بدل ما يضيعها في كلام فاضي يصرفها على نفسه و عليها في شهر عسل و لا إستثمار للمستقبل….على بالك حتلوي ذراعي بمبدأ “ترضاه لأختك؟”
و قلتي:
“وهلكتونا ياشباب بكلامكم اللي لو مالقيتو بتتزوجو من بره .. صدقوني الطريق واسع ومفتوح ..
تزوجو اللي تبغوها واللي تعجبكم .. بس في المقابل ايش اللي يضمنكم إنها تستاهل تشقى عليها وإلا تكمل حياتك معاها ..”
نفس الكلام ينطبق عليكم يا بنات البلد…ما في احد أحسن من أحد…
و قلتي:
“بس ادفعو شي معقول ويكفيها لإن مافي أحلى من البساطه وعدم التكلف ..
لإن ماأتوقع إن في عاده جديده إن مثلا الأب يجهز لبنته على حسابه !!”
في بعض مناطق الهند أبو البنت هو اللي يجهز لكل شي لكن ما علينا منهم….ما نبغى من أبو البنت شي لكن اللي صاير دحين مو مقبول أبدا…و المشكلة يا ميوتة ان البساطة يختلف مفهومها عندكم عننا احنا الأولاد….مهما ادعيتوا البساطة في أشياء ما ترضوا تتنازلوا عنها….
و قلتي: “اتعبو شويه كل حياتكم تبغوها راحه في راحه وشروط في شروط ..”
ها!….ردي عليكي نفس ردي على Stray cat….مع احترامي الشديد لكي بس مو انتي اللي تتكلمي عن الراحة و البهدلة….و انتي أدرى مني ليه
و قلتي:”مجتمعنا اللي خلانا بحاجة الرجال”….
لا يا عزيزتي….ربنا سبحانه و تعالى هو اللي خلق هذي الفطرة في الرجل و المرأة….مو المجتمع….فبلاش تخبيط في الكلام…
و قلتي أخيرا:”وإلا صدقني المرأه أذكى وأنفع من الرجال بمليون مره .. وكل واحد يقدر يصنع نفسه بنفسه ..”
حاولت ألاقي مكان للجملة هذي في الموضوع ما لقيت صراحة…ما راح أرد عليها لأن تفكيرك غير منطقي و لا موضوعي و لا يمت لحديثنا بصلة…و باين انك كتبتي هذا الرد و انتي متنرفزة….ريلاكس
و قلتي في ردك الثاني:
“للأسف مافي مجال للمحاوره هنا .. لإنها من بدايتها باينه إنها عقيمه ..”
عجزك عن النقاش و الحوار لا يعني أن النقاش عقيم…إذا ما قدرتي تضيفي شي جديد في حوارنا غيرك يقدر…و الأخت زينب أكبر مثال
أتمنى إنك ما تكوني زعلتي…و لو زعلتي حقك علينا
أبا سند المعظم:
كلمة وحدة بس: آآآآآآآآآآآآآآآآمييييييييين
الأخت زينب:
تحية سلام على ردك العقلاني اللي فتح لي باب جديد للنقاش…
قلتي:”ومنو قال لك المعرفه تكون بس هذي الفتره البسيطه …معروف في علم النفس المفروض تكون المده أطول بسبب ان كلا الطرفين في البدايه يجامل أو يتصنع أو يكذب وماتبان الشخصيه الأصليه الا بعد فتره على الأقل تكون سته أشهر وبعدها الخطبه ويكون فيه تعارف في فترة مابعد الخطبه اذا صلحوا للزواج صلحوا ماصلحوا كل واحد يشوف مصلحته”
علم نفس مين يا أختاه…أنا معاكي لكن عندك عالم هنا الله بالخير…عموما أتفق معاكي في أن تكون المدة أطول قبل “الملكة”…الشيء اللي يقودنا لشيء ثاني…في الفترة ما بين “الشوفة” أو “الخطوبة” زي ما نسميها في الحجاز إلى الملكة أو العقد ما تتفقي معايا ان المفروض المجتمع يتساهل شوية في مسألة كلام الولد لخطيبته؟….علما بأن بعض العلماء أجازوا هذا الشيء عشان لا يتدبس الولد بعد الملكة و وقتها ما راح يرجع له شي اذا ما صار نصيب….في الفترة هذي يا إن الولد يزبط البنت و يمشيها على هواه أو هي تزبطه و تخليه يعمل اللي تبغاه….و وقتها كل واحد ينام على الجنب اللي يريحه….أما كذا خبط لزق و مطفيين النور مرة ما ينفع!
المشكلة يا أخت زينب إن الناس بتغار من بعض….اللي ما عنده الا يبغى يسوي زي اللي عنده…قلوب النس مليانة غيرة و حسد….كله طبعا عل حسابنا احنا….
تحياتي لكي
السيد أحمد: من أجمل الردود اللي قرأتها و أكثرها عقلانية…و لي بغريب على الحضارم
حورية:الجميع يا رب
تحياتي لكم
مرحبااا
شخبارك اخوي..
من زمان عن تدويناتك…
لسه معاناااااه بالشرقيه
الله يعين
تدري كلااامك كله علي عيني وراااسي وانا معك ومقتنعه
لكن حابه اضيف شغله
عندنا نوعين من الشباب المقتدر والغير مقتدر
يعني اللي قادر يسوي لي كل اللي ابيه
ليش اقوله لااااا
اما اللي ماهو قادر فعلااا محتاج لمراعاة بحاجات هذي
وبالنهايه اهم شسي الاخلاق << قديمه صح
^_^
استغفر الله العلي العظيم
تلخيص للموضوع تمهيدا لإغلاقه:
لماذا الاستماتة الشديدة في الدفاع عن رأيك يا أبا الوس إلى حد الجلافة في بعض الأحيان؟
ببساطة لأني إنسان واقعي…و لا أعيش في “La La Land”…أرى و أعايش معاناة الشباب في سبيل إكمال نصف دينهم…
لكن…..أليس من حق الفتاة أن تحظى بليلة و لا كل الليالي علما أن كهذه ليلة لن تتكرر لها؟
قد يبدو جوابي غريبا….نعم تستحق…
ألا ترى بأنك تناقض نفسك؟!
لا….فبعد تفكير و نقاش مع أحد الأصدقاء…توصلت إلى حقيقة أن الفتاة ضحية كما الشاب في هذا المجتمع.
و كيف ذلك؟
معظم الفتيات في مجتمعنا قد حجمت أحلامهن و طموحاتهن….ففكرة الزواج و إنجاب الأطفال هي التي تغرس في معظمهن منذ نعومة اظفارهن و لامكان لفكرة فتاة تكون فردا صالحا في المجتمع تعمل على رقيه و رفعته…فلا وظيفة تحقق فيها الطموحات و لا عمل يحقق لها الاستقلال المادي….فلا يوجد لها سوى الملاذ الأخير و هو الهروب من تسلط الأهل إلى أحلام الزواج…فتضع كل آمالها و أحلامها في هذه الليلة…
أتقصد ان لو كان للفتاة أهداف و غايات سامية في الحياة فإنها ستترفع عن المظاهر و الشكليات في ليلة زفافها؟
ليس بالضرورة….فهذا الأمر راجع إلى نفسية الفتاة و تربيتها…و لكنه بالتأكيد سيحد بشكل كبير من هذه الظاهرة….
يقول البعض في موقف دفاعهم عن ظاهرة ارتفاع تكاليف الزواج بان المرأة السعودية لا تستطيع الحصول على أي حقوق في حالة ما ساءت الأحوال بينها و بين زوجها…و أن المرأة في الغرب تستطيع الحصول عل حقوقها لذلك لا تطلب الكثير في حفل زفافها…
لا أعلم….قد يكون صحيحا أن المرأة في الغرب إذا ما لجأت في المحاكم تستطبع الحصول على حقوقها….لكن ما دخل هذا بإرتفاع تكاليف الزواج….هل تعتبره المرأة السعودية “بدل عبودية” أو تعويض عن المذلة التى افترضت أنها ستحصل لها عاجلا أم آجلا؟…..
و لكن الرجل إذا ما بذل الغالي و النفيس في سبيل إمرأة فإنه لن يتخلى عنها بسهولة…هكذا يقول البعض في معرض دفاعهم
حتى و لو أبقى الرجل امرأة لا يطيقها على ذمته بسبب ما قلت….كيف ترضى هي بالمذلة و أن تعيش في كنف رجل لا يطيقها؟
كفاحك في سبيل توفير كل هذه التكاليف يجعلك تشعر بالمسؤولية….هكذا يقولون
اسمح لي يا عزيزي…كل من يعتقد أن تعلم المسؤولية يكون بهذا الشكل فهو لا يفقه شيئا في الحياة…و لا يعرف شيئا عن الصعاب و المتاعب التي يواجهها الشباب في مجتمع منافق كمجتمعنا
هدئ من روعك يا رجل…الأمر لا يستحق كل هذه العصبية
بل يستحق….فلا بنت البلد راعت ظروف ابن بلدها….و لا الحكومة يسرت الزواج من الخارج….
و لماذا تريد الزواج من الخارج؟….لن تجد أفضل من ابنة وطنك تفهم ظروفك و عاداتك…
أعترف لك بذلك…و أؤكد لك بأني لن اجد أفضل منهن….لكن عليهن التوقف عن التفكير بأنانية….فنحن في زمن لا يرحم…و إذا لم يتعاونوا مع أبناء جلدتهن فمع من سيتعاونّ؟
انتهى….
تحياتي لكم
انا من دخلت المدونه واشم ريحه الحرب
عجبني الموضوع
بدايه يعطيك الف عافيه موضوع مهم لكن انا لاحظت ان البنات تغيرو!!
طلباتهم اصبحت معقوله ..واتوقع انهم فهمو ان السعاده مو الفشخره والاسراف الي ماله لزمه اهم شي المتطلبات الاساسيه والبركه في الشي اليسير
نقطه ثانيه كمان:
اغلب البنات قبل الزواج تفكر انها بتكون متفهمه وطلباتها يسيره واهم شي اخلاقه وماتحمله فوق طاقته ولما يتقدم لها الخاطب هنا يبدا كلام الناس فتكون خايفه من نظره المجتمع وماتبي تكون اقل من احد وتبدا الطلبات الي مالها داعي..ويمكن هي ماتكون مقتنعه فيها بس علشان تسكت الناس وهذا يدل على ضعف الشخصيه والامعيه الزايده عن حدها
السلامو عليكم ..
للأسف ما حالفني الحظ اني أتواجد هنا أيام ما كان الموضوع حآمي
بس يلا أن أصل متأخرة خير من ألا أصل :P
الموهم ..
و انها هيا الأفضل !! 
البوست دا راااااااااااائع جدًا ..
و ما تتصور قد ايش دا الموضوع غايضني ..
بصفة عامة أنا أملك _نقم_ وَ (حقد) وً /قهر/ مو طبيييييييييييعي ع عادات و تقاليد المجتمع .. .
بالعربي واصلة حدددددددددددي منها بشكل خورافي<< اكره التعميم .. عشين كدا بأقول مو كلها .. بس جُلْها و أغلبها .
..
بالنسبة لموضوع التجارة دي
فأنا أأيدك بقوة شديدة ..
حقيقي مجتمعنا مو طبيعي . قاعد بيتمسك ف أشياء غلط .. و الطاااااااااامة الكبرى انو ((حاسس انها صح))
مسلا أنا وحدة من الناس أحب البساطة فـ كل الأمور .. و دايمن بأقول لأهلي و حتا صحباتي انو انا بدي أعمل فرحي فـ البيت .. من مبدأ البساطة .. و من مبدأ إني ما أرتاح فالأماكن الكبيرة .. و من مبدأ إني أبا الحميمين جدن هما جست الي يحضرو ..الخ .. يعني في إيجابيات كتير حلوة لــ الجواز البسيط
الشاهد في الكلام .. انهم جدن معارضين كلامي .. للدرجة الي تخليهم يقولو مرررررا أحلمممممي مستحيل يسير هيك !! !!!!! << مية علامة تعجب
..
و ترا فـي بنات و أمهات بيستنزفوا للجوازات حتا من الأبو مو بس من الخطيب ..
عندي مسلا صحبتي عملت شبكة في قاعة كبيييييرة << نقول عادي نمشيها
و الجواز طبعن فـ قاعة و كول حاجة
بس قبل الجواز بأسبوع في بعض الناس يعملو حاجة اسمها (غمرة)
يعني العروسة تتزف بلبس تراثي تقليدي اي شي .. و يكون ع خفيف بس الأقربين
الموهم .. صحبتي دي سوت غمرتها فـــي قاعة برضو !!
و طبعت كروت و كوشة و مصورة و كل تواااااااابع اي فرح عادي !!!
حاجة مو طبيعية صراحةً !!
مرا الله يوفقهم كولهم ..بس لييييييييش البذخ ..
و ليش أساليب التعجيز دي ؟؟ ؟!
و عنجد انا اقولها من أعماااااقي انو مرا معا نفسهم كول الي يطلبو مهور غالية .. عنجد 30 احس كووويس و مرا لاتزيد عليه !
و الله يعين البنات الي أهاليهم موقفين نصيبهم بسبة دا المبدأ الشنيع !
..
في وجهات نضر شوفتها فبعض الردود مرا اتعجبت منها ؟!
عنجد الله يهدي الجميع ..
..
تحيتي و سوري جدن ع الاطالة بس اتحمست
مرحبا أ.وسيم..
تغيبت عن النت لفترة لأرجع على موضوعك ((الحماسي جدا))
واللي يطلع من القلب يدخل القلب.. فنقلت حماسك لكل القارئين.. واعجبني جدا هذا الحماس..
ذكرتني بحوار دار بيني وبين أحد الشباب السعوديين في فصل دراسي كان يفترض ان الحوار باللغة الإنجليزية ولكن من شدة الحماس انقلب إلى عربي، ولم يسكتنا إلا الاستاذ الغاضب من الحديث باللغة العربية..
ومحور الحديث ((والدزوجته)) الذي طلب مهرا مبالغا فيه وطلبات لاتعد ولا تحصى،، ووضعه المادي الصعب بعد ذلك.. وأخذ
ما ألومك كتير
الوضع فعلاً مستاء للي يبغو يتزوجو
و الأهالي مستخفين بالموضوع
يجب إتخاذ أسلوب منطقي و واقعي جديد
بس ما تشوف إنه التعميم زايد عندك شوية؟
تسلم
موضوع في الصميم وقلت كل الكلام إلي في بالي من زمان
وأحب أزيد إنه من باب العدل والمساواة إلي صاجينا بها هذي الأيام … إن أهل العروس يدفعون نص تكلفة العرس (قلت العرس مش المهر، المهر على العيس، ما يبغي لها كلام) …
الأخوات إلي صاجينا بإنه من باب العدل إننا ما نزعل لو جت وحدة وتزوجت لها أجنبي.
فأقول لكم … عليكم بالعافية … روحوا شوفوا لكم عريس أجنبي
إذا المواطن مش قادر على تكاليفكم، فتظنين إن الأجنبي راح يقدر، خاصة إن البنات في ديرته على “قفى” من يشيل؟
والله موكل الناس بها العادات فيه ناس مايلزمهم قاعة بيكون الزواج باي صيوان بيرتبوه ع نظام القاعه من طاولات وحلى وموالح وهدايا للحظور طبعا والعربية ابد مالها لزمة يعني زواج متواضع وعلى قد الحال فيه ناس بتيسر الزواج قد مافيها ومالها ومال الناس وعلى كلا رضى الناس غاية لاتدرك
مهر: 30 ألف <<<<< الغالب في الاحساء 25 الف
في الاحساء
شبكة: 10 آلاف <<<<>>مدري ايش قصدك بس عندنا في الاحسا نسميها ((الدفعه)) تقريبا 5000 وكل واحد وعلى كم يدفع بعضهم مايزيد محتوياتها عن 1000 ريال
إيجار بيت: 25 ألف <<>>والله مدري بناتنا كم يكلفون الرجال
قاعة: 30 ألف >>> على حسب راتب الشاب يتم اختيار القاعه وغالبا قاعه ب 20 الف تعتبر فخمه جداااااااااااااااااااا عندنا واحنا عندنا عادة تزويج اخوين مع بعض اختصار للمصاريف العشا والقاعه
عشا: 15 ألف <<<< على حسب حجم العائله ومعارفهم وماسعت الا 10 الاف هذا غالي جدا عندنا ومن مطابخ الكشخه
شهر عسل: 15 ألف <<<>>>هدايا حق ايش ؟؟؟
طقاقة-جني يطق راسها ان شاء الله-: 20 ألف >>> دي جي ب 1000 ريال
ازين مافي الاحساء ان الشاب يصرف على قد وظيفته والبنات متفهمين هالشي جداااااااا
ولو انهم بدوا شوي يتغيرون هالسنتين
بس مشكلتهم مايتزوجون الابنات ال 18 وال 16 وال17 وال15 اكبر من كذا لا كبيره
وخصوصا بعد ال22 معنسه تعتبر
المشكله الي نواجهها الحين انتشار ظاهرة ان الاب يعطي مهر للبنته لما تنخطب
نفس الي عطاها خطيبها بس لسا في عوائل كثير ماوصلت لها هالظاهره
وفي شي حلو عندنا ان حفلة الخطوبه على حسب مين يطلبها اذا الشاب اهل الزوج طلبوا حفلة خطوبه
تكون على حسابهم
اذا البنت تبي حفلة خطوبه يكون على حساب ابوها
والاغلب حفلات الخطوبه رخيصه جداا في استراحه ماتتعدى سعرها ال1000 ريال
وعائليه … وبما ان الاحساء واحه فالكثير عندهم مزارعهم الخاصه او اقاربهم فتكون مجانيه او بسعر رمزي
او في البيت
بس المشكله لسا بدات تنتشر هالظاهره ضروري عملة حفلة خطوبه بس الشيء الجيد الان ان تكاليفها جدا بسيطه
الي اسمع ان الزواج مايكلف عندنا اكثر من 100 الف شامل كل شيء وانا اشوفها نسبه معقوله مقارنة بغيرها من مناطق المملكه
في تعديل
شبكة: 10 آلاف >>>قبل ارتفاع الذهب 3000 والغاليه 5000 بعد الارتفاع اذا كان شاب وظيفله مرموقه ومن عائله ميسوره يدفع هالسعر او اذا على القد اقل من كذا…والدبله اذا غاليه عندنا 500 واذا غاليه جدا جدا 1000
عربية ملكة بمحتوياتها: 10 آلاف >>>5000 الى اقل من هالسعر والاغلب على حسب وظيفة الشاب على قد الي يقدر يدفع
كلام سليم ووجهة نظر صحيحه
الحال لا يختلف من السعوديه وبعض البلدان العربيه
حتى في فلسطين تصل التكاليف الى ربع تكاليف السعوديهواكثر من الربع
بينما كمات تفضلت في الغرب تعتبر لا شيئ مقابله مع تكاليفنا
اللهم اهدي اولياء شباب وبنات المسلمين واستر علي شبابهم
شكرا عزيزي على اثارتك للموضوع .. وانتبه يتقطع مخك .. محتاجين تدوينات حلوه متل هيك ^_^
بضيف حاجه سمعتها من واحد يقول:
اول الشاب يتزوج ويشق مع زوجته طريق الحياه,
الحين الشاب يشق طريق الحياه عشان يتزوج
الاجانب حتى هم تكلف زواجاتهم كثير تغيروا مونفس قبل
انت ماتابعت برايدزيلا >>>ماعرف اكتبه بالانجليزي
وغير كذا نسيتوا هم اذا عزموا احد وكان خارج الدوله او بمنطقه بعيده لازم تدفع تذاكر الطائره
والله من جد
مو نفسنا يايدفعون هم او مايجون مومظطرين نندفع لهم تذاكر الطائره
أخي وسيم…
أنا معاك في المطالبة بخفض التكاليف 100% بس أسلوبك استفزازي بالنسبة لكثير من البنات (إللي أنا ما ني منهم) و بالتالي راح يؤدي موضوعك لنتيجة عكسية و لعناد و حرب…
في الزواج الرجل داااااااااااااائما يدفع…سواء كانت الزوجة سعودية أو اجنبية…هذا أمر لا مفر لكم منه…أجل إنتو قوامين علينا ع الفاضي؟
كل امرأة لها متلطباتها في الحياة مهما كانت جنسيتها…قد تكون المرأة السعودية متطلبة قبل الزواج لكن الكثير من بنات العز تزوجوا و صبروا على أزواج فقراء و عاشوا سعيدين و قد لا تكلف الأجنبية مثل السعودية و لكن تكلفتها بعد الزواج غالية جدا و خصوصا إذا أخذت أولادك و هربت على بلدها و رفعت عليك قضية حضانة و نفقة…
في كل الاحوال الاعتدال مطلوب و مهم و أهم من هذا كله أن تحب المرأة التي ستتزوجها و تقتنع بها فهذا يهون كثيرا من المصائب
و على فكرة ..حتى الـ prostitutes يكلفون الكثير فالدفع وراك وراك…
الله يرزقك و يرزقنا..
و أخشى ما أخشاه يا وسيم أن تندب على عينك و تتزوج وحدة ما تستاهل و تدفع لها إللي فوقك و إللي تحتك …كل اللي اتفلسفو زيك كانت هذه نهايتهم…تجي وحدة ما تسوى تمشيهم ع العجين ما يلخبطوه…أقول هذا الكلام من واقع خبرة طويلة…فانتبه على نفسك و تذكر من يتق الله يجعل له مخرجا و إللي بغى العفاف ربنا يسهل له طريق الزواج بطريقة أبسط مما تتخيلها…أما البنات المتطلبات فصدقني راح يخللوا في بيوت أهاليهم
تحياتي لك
أخت مها:
“أجل إنتو قوامين علينا ع الفاضي؟”
يا سبحان الله!….دحين طلعت نغمة القوامة….الله يرحم أيام المساواة! و لا شي و شي؟
أوكي…قوامة مو مشكلة….ايش دخل المبالغ الجامدة اللي ذكرتها أنا في القوامة؟ كأنك تقولي اللي زواجه على قده قوامته برضه على قده
و المشكلة يا مها في اللي قبل الزواج….على راسها ريشة المرأة السعودية و لا على راسها ريشة؟ من فين الشاب يدبر “المتطلبات” كلها هذي؟
”
و ان كنتي فاكرة كلامي فلسفة فأشهد يا تاريخ اني أكبر فيلسوف….على الأقل ليا موقف من هذي البلاهات اللي صايرة…و إن “اندبيت على عيني” زي ما تقولي فالحمد لله قسمة و نصيب و هذا الأمر الواقع لكن ما راح أكرر الشي هذا مع بناتي إن شاء الله… الوضع قاعد يزداد سوءا و الناس دافنة راسها زي النعام….
و إن كان أسلوبي استفزازي للبعض فعلى ما أعتقد اني بينت هذا الشي في بداية التدوينة….هذا الحق و لازم ينقال..و اللي يعاند هو الخسران و انتي قايلة هذا الشي بنفسك:
“أما البنات المتطلبات فصدقني راح يخللوا في بيوت أهاليهم
تحياتي لكي
أولا/ دعــاء فين بيتكم؟ انا جاي اخطبك خخخخخخخ
ثانياً/ يا بنات لو فكرتوا بالعقل الفلوس هذي اللي تنصرف في ليلة وحدة مو ممكن انها تعيشكم احلا عيشة و أثاث من احلا الأثاث و أثرها يبقى على لياااالي عديدة؟ /و مو كذا و بس* زوجك راح يقدرك لأنك “راعيتي ظروفه” في وسط الغلاء الحاصل في اليومين ذي..
/..* وانا اكتب الجملة ذي حسّيت اني مصري مسوي إعلان>>نو إفّنس يأخونّا
ثالثاً/ يا شباب مسوين فيها الشيخ متولي اللي يبغا يتزوج 3 و 4 ترى بعد ما تتزوج “و تعرف تتعامل مع زوجتك” و احط تحتها 128 سطر ما راح تحس ان لك نفس تتزوج اصلا و لما تنوي تتزوج انوي انك تكوّن عائلة سعيدة
رابعاً/ احنا معروفين بأننا امة وسطية يعني الزواج-المهر و الشبكة و و و…إلخ- ما يكون افخم شي ولا أسوء شي و يكون في قدر المستطاااع قال عليه الصلاة و السلام (اوّلم ولو بشاة) يعني اقل شي شاة و اللي هيا أكثر شي يستطيع يدبره الصحابي
و بهذا نخرج بالمعادلة
تكاليف الزواج المثالي= متوسط التكاليف الزواج في المجتمع <= قدرة الرجل
بكرة عندكم إمتحان في المعادلة و الدرس السابق
وووو وعّوا اللي حولكم من الشباب… ترى جيلنا مو مسؤول عن مجتمعنا اليوم لكننا مسؤولين عن مجتمعنا غداً
و سبحانك اللهم أستغفرك و أتوب إليك و الله يعينّي على تكاليف الزواج و يسهله عليكم يا وليّ يا مُعين