أمي <==> حماتي؟
إذا كنتم فاكرين ان الحرب اللي شنيتها على تقاليد المجتمع السخيفة في الزواج قبل اسبوعين انتهت فانتم غلطانين…نيران الحرب لسه مولعة لكن هذي المرة عل جبهة غير….أم العروسة أو “الحماة”؟….لا طبعا….كلامي عن أم الشاب الغلبان اللي يبغى يتزوج…اللي قد توصل إلى درجة الحماة و هي ما تدري….
الحماة في ثقافة المجتمع العربي عدو الرجل الشرقي رقم الواحد…من يوم ما كنا صغار و احنا نسمع الحكايات و الأساطير عن كيد الحماة و تطفيشها لزوج بنتها (أو زوجة ابنها) و غالبا يكون الدافع هو حسن النية….و حسن النية هنا نسبي جدا….فالحماة ما غالبا ما تبغى يكون مصير بنتها زي مصيرها مع “سي السيد” الجبار المتسلط…و لا تبغى ولدها يكون خاتم في صباع زوجته….
لكن…كيف تصير أم الشاب “حماة” له…..بالمفهوم الشرقي طبعا؟؟؟
غالبا أم العروسة هي ا اللي تعقد زواجة بنتها بطلباتها المعقدة و المظاهر اللي مالها داعي…اشي قاعة ب 100 ألف…و اشي مهر 50 ألف…و اشي عفش من ايطاليا…و اشي شيكولاتة من الغالي…و اشي معمول و غريبة من “أم نبيل”…و القائمة تطول…
أوكي…ما اختلفنا…هذي الأشياء متوقعة من أم العروسة…لكن لما تجي أم العريس و هي اللي تحط العقدة في المنشار هنا تكون المشكلة!
قبل عدة شهور..جاني واحد من أقاربي مهموم حزين….استفسرت عن سبب ضيقته….قال لي: أمي
-ايش فيها أمك؟
-زعلانة مني و عاملة لي مشاكل و تقول لي انت ولد عاق و اشتكتني عند خوالي
-خبر ايش سويت لها؟
-ياخي اتفقت مع أبو خطيبتي مهر 30 ألف…و أمي راسها و ألف سيف ما أدفع أقل من سبعين…
-سبعين ايه؟ سبعين ريال؟
-لا يا خفيف…سبعين ألف
-؟!…كيف دي ما تجي و لا تنصرف في أي بنك….ليش أمك تبغى تخسرك؟
-تقول لي احنا مو أقل من غيرنا….و ايش يقولوا عننا الناس
-……(قاعد أحك راسي أحاول أستوعب الموقف)
- طبعا أنا رفضت و قلت لها لا و ألف لا….أبو البنت قال تلاتين…قامت مسكتني من يدي اللي توجعني و خلتني عاق و ما أسمع كلامها و راحت اشتكتني عند خوالي….
-……(لسه بأحك راسي…هو الموقف سهل يا جماعة؟)
طبعا مرت الأيام و تزوج صاحبنا و عرفت فيما بعد ان أمه هي اللي دفعت المهر من مالها لا لشي إلا لإتقاء كلام الناس عنها…مع إنه كان غير راضي بهذا الشي لكنه كان طرف في معركة خاسرة من البداية…
ما أدري يمكن تكون حالة فردية و لا يجوز تعميمها….و يمكن أحد من قراء هذي السطور مر عليه أو سمع بموقف زي هذا….لكنها في العموم مؤشر خطير لمدى تغلغل المظاهر في المجتمع السعودي…تغلغل لدرجة وقوف الأم في وجه سعادة ابنها عشان ترضي شوية “معازيم”لا راحوا و لا جوا…
على الأقل صاحبنا اللي فوق أمه في النهاية دفعت من جيبها…..لكن غيره أمهاتهم يطلبوا و يطلبوا و يطلبوا و مين يدفع؟ العبد الفقير طبعا!…خصوصا إذا كان البكر و أول واحد من أولادها يتزوج فإنها غالبا حتلعب على هذي النغمة….و يا ولدي نبغى نفرح بيك…طيب إذا ما عندي؟ “تتدبر” يا ولدي…و إذا عصلج معاها تجيه من باب “العقوق”…الشي اللي ينبهني الى الطبيعة “الميكافيلية” في بعض الآباء و الأمهات في مجتمعنا….بوسيلة “العقوق” يستطيعون الحصول على كل “غاياتهم” من أبنائهم حتى لو كانت على حساب سعادتهم…
يارب لا تحطنا في موقف زي هذا…..قولوا آمين….
سؤال للشباب….و للشباب فقط….لو صار لأي واحد منكم موقف زي هذا و لعبت معاك أمك كرت “العقوق” و قالت انها مهي راضية عنك ايش راح تسوي؟
هل تتنازل عن آرائك و مبادئك في سبيل رضاها و تقول العوض من الله؟
و لا تنشف دماغك و تقول راح تتقبل الأمر الواقع؟
سؤال أتمنى إجابته…
أعجبني
:)
على
والله حاجة غريبة!
بالنسبة ليا، سلاح العقوق ليس في مكانه و -إن شاء الله- لن أخاف من أنني أعصي الله في شيء إذا لم أسمع كلامي أمي في هذه الحالة. نعم قد تكون هناك مشادات و أخذ و رد إذا كبر الأمر ، لكن مهما كان المبدأ صحيح و سوف أبقى عليه.
طبعا من خبرتي مع أمي شخصيا: لا اتوقع شيء مثل هذا لكن قد تكون هناك “مفاوضات” على أشياء أخرى على درجات مختلفة.
أنا عندما أفكر في كل “معضلات” الزواج: أليس بسيطا جدا بصفتك الرجل المعني في هذا الزواج أن تقول نعم و لا وقتما شئت؟! و خلي المعازيم يدقو راسهم في الجدار إلى بكرة ، لأنو ما نشوفهم الا يوم العزومة ، لاهما بيعيشو معانا و اي شي!!!
الله يسهل علينا و عليك
في حديث عن الرسول صلوات ربي وسلامه عليه في ما معناه (أرضي أبويك “وإن ظلماك” )
انتهى !
شخصيا…راح استبدل المخ بـ “جزمة قديمة” وأبقى على موقفي، لأن المبادىء الغريبة تتطلب تصرفات غريبة مثلها.
وممكن الواحد “يدحلس” الموضوع يمين يسار لين ما ترضى أمه عنه، يسوي سند قبض وهمي مثلا
المشكلة يا عزيزي لو انك وجدت فتاة احلامك وكان العائق الوحيد بينك وبينها هي بعض هذي التفاهات (مع الاخذ في الاعتبار انها معارضه لهذا الشيء) …هل راح (تتكعّف) المبلغ ؟ ولا مستعد تضحي بيها؟
تدوينة جميلة لكن تفوّر الدم…
اكره سلاح العقوق دا اللي كثير امهات يستخدموه على لاشي !
امم .. امي مو من دا النوع بس لو استخدمت معايا دا السلاح حأرضخ بس حاافهمها انو دا الشي عشان لاتزعل مو عشان أنا مقتنعة
وأواسي نفسي اني رضيت أمي وربنا ح يوفقني ببرها ..
ع فكرة مين أم نبيل ؟
والله انا ما اعتبروا عقوق ولا حاجه
دحين ابو البنت قاعد يسهل زواجكم وتجي ام العريس وتخرب الشغلة !!
الحمد لله في عايلتنا ما قد صار هادا الحكي لكن ما استبعد انو بيصير في عائلات تانية لانو اعوذ بالله الام ما تفكر الا في نفسها ..اماالولد فمع نفسوو
فعلا عش رجبا ترى عجبا
واللي يعيش ياما يشوف
و الله شوف يا وسيم
أنا الحمدلله ربي رزقني بوالدين عارفين البير و غطاه، و المعازيم ينطقوا بأكبر طقاق و عسى عمرهم ما رضيوا.
لكن…و في الحالة الإفتراضية إني أتحطيت في دا الموقف، راح أعرف إنه هرجة العقوق دي لعب بالأعصاب، و اصطياد في الماء العكر لا أكثر و لا أقل، و هو بلغة الباش مهندس محمود “بريد أسود” Black Mailing، عيني عينك.
انا من النوع إلي ما أقدر أروح أنام وأمي زعلانة مني. لازم أروح أبوسها على راسها وأطلب رضها.
لكن في الأحيان إلي أدري أنا انا على حق، برضوا أروح أبوسها على راسها، وأقولها “سامحيني إذا زعلتك، لكن أنا كلامي صح، وإذا ودك تزعلي نفسك، فما هي غلطتي أنا”.
الله يطول بعمرها، لها فترة تحاول تقنعني أتزوج وانا أقولها شوفي لي وحدة يتيمة الأب والأم، او على الأقل يتيمة الأم … صحيح إني طيل بال و طيب وخدوم بزيادة، لكني ما أسمح لأي أحد مهما كان إنه يتدخل في مسائلي الشخصية.