وسيم عازب

عالم وسوس….سنتان من المزاجية!

نشر في 3 يناير 2010 في السنة الثانية,يوميات وسيم بواسطة وسيم عازب

بكل بساطة…..المدونة كملت سنتين….و تحديدا سنتين و عشرة أيام من يوم ما سوينا الدومين في 23/12/2007….طيب ليش ما نزل الموضوع قبل 10 أيام؟ أعتقد ان العنوان أعطاكم الجواب نيابة عني…..

أكبر خطر يهدد استمرارية هذه المدونة ليس المنافسة من المدونات الأخرى…..و لا هجمات “الهكرز”….بل مزاجية الـ1700 غرام اللي مستأجرة الدور اللي فوق!

المتابعين لهذه المدونة أكيد لاحظوا عدم ثبات الكتابة في هذه المدونة على وتيرة واحدة…..بعض الأحيان ستة سبعة مواضيع في الشهر…و أحيان كثيرة يعدي شهر و اثنين و ثلاثة و كأني اختفيت من على وجه الأرض….تجي فترات فاتح المدونة 24 ساعة و فترات كأنها ابن متبري منه!….

تقبلوا اعتذاري عن مزاجيتي اللامبررة….و أحب أشكر كل من راسلني و استفسر عن غيابي و كل من سألني عن العودة للكتابة مرة ثانية….إن شاء الله أحاول أرجع لمود الكتابة في أقرب وقت ممكن…

بس خليني أقولها لكم من دحين….إذا يوم من الأيام حاولتوا تدخلوا المدونة و ما لقيتوها أبغاكم تقولوا: قتلتها المزاجية!

=======================================================================

انتهينا من الإحتفالات و الأعذار خلونا نلحق على اللي صار في الشهرين اللي فاتوا:

• ضغط العمل كان فظيع….و يمكن يكون هو السبب في انقطاعي عن الكتابة….بعد المزاجية طبعا
• سيول جدة: صحيح انها صارت أكلة بايتة لكن ليا رأي في اللي صار….
• صار لي حادث سيارة في أول يوم عيد الأضحى في الطريق اللي ما يتسمى دا (طريق الجبيل الظهران) و إلى الآن قاعد بدون سيارة….قاعدين يصلحوا في السيارة هذا كله و الله لو انها ايش!
• خليجي تريب: من المنامة إلى دبي و بعدها إلى الدوحة…..رحلة خليجية قمنا بها أنا و مجموعة من الشباب……الوجهة القادمة: الكويت…أكلمكم عن أحداث هذي الرحلات قريب إن شاء الله
• صادرت البلاي ستيشن أخيرا من أخواني….حقي أصلا فما يسمى مصادرة….و حأبدأ ماراثون البلاي ستيشن قريبا…الألعاب المشاركة: Modern Warfare 2…..Assassin’s Creed II….Demon’s Souls….بإنتظار شهر مارس و الأسطورة Final Fantasy XIII
• بس!….تراها شهرين مو سنة

اللي فيكم يعرف أغنية Eminem :Without me يقعد يردد مقطع البداية حقتها….و اللي ما يعرف نجيبها له….بعد التعديل طبعا:

Guess who’s back, back again
wsws’s back, tell a friend
Guess who’s back, guess who’s back
Guess who’s back. guess who’s back
Guess who’s back, guess who’s back, guess who’s back

سلام