أربعين يوم بدون سيارة!
آآآآآتشووووو!!!
معليش…الزكام و ما يسوي…..جاني برد و أنا أستنى خويي اليوم الصباح عشان نروح الدوام سوا…زي ما خبرتكم في التدوينة اللي فاتت صار على “المحروسة” حادث في طريق الجبيل-الظهران أول أيام عيد الأضحى-اللي كان بالمناسبة عيد حلو- بعيد عن أهلي، سيول جدة و الحادث…عيد و لا أحلى…
آآآآآآآآآآآآآآآآتشوووووووووووو…..المعذرة يا جماعة….
الحمد لله أنا طلعت سليم من الحادث…..السيارة تخرشمت واجهتها…و ما في طرف ثاني و الحمد لله…أنا و الصبة “الخرسانة” بس 
…اليوم أكمل 40 يوم بدون سيارة-أفتكرت أيام الجامعة نوعا ما- طبعا كثير منكم يتسائل: و ليش قاعد بدون السيارة؟ ما صلحتها؟ و الله يا جماعة السيارة في طور “الإصلاح”….بس عشان احنا في بلد فيها قوانين تحفظ حقوق المستهلك و تضمنها له الوكيل قاعد يتغلى و مسوي ثقيل…و عارف انه ما في أحد يقدر يقول له لا فبيسوي اللي يبغاه….
كان خوفي في بداية الموضوع من شركة التأمين….بما إنها الأخت التوأم للبنوك فما يفرقوا عن بعض في الإستلكاع و النذالة….لكن- و إلى الآن لسه مستغرب- الموضوع ما قعد عندهم أكثر من يومين…خير و بركة….يلا إن شاء الله الوكالة زيهم….لكن هيهات!
آآآآآآآآآآآآآآآآآآآآآآآآآآآآآآآآآآآتشووووووووووو!!!!!….
بما إننا عرب فأكثر شي فالحين فيه هو ايه؟ بالضبط! الكلاااااااااااااااام…بياعين كلام درجة أولى…طيب كويس اننا فالحين في حاجة! لما رحت الوكالة استقبلني أخ من دولة عربية مجاورة و حسسني ان الموضوع ما راح يأخذ أسبوع بالكثير!
” لا تشيل هم يا أخ وسيم….أول ما يجي التعميد من من شركة التأمين عديل نطلب غطع الغيار و في يومين ان شاء الله توصل و بعدها عديل نبدأ في السيارة”….حلو….ماشاء الله على كذا و كالات!…كان الكلام هذا يوم 8 ديسمبر…جا التعميد بعدها بيومين….يعني يوم 10….و القطع توصل المفروض يوم 12 ديسمبر….رحت البحرين…دبي….الدوحة….جدة…البحرين….و القطع لسه ما وصلت!…..طول الفترة الماضية كل ما أكلم أخينا هذا المحادثة هذي تصير:
أنا: يا أخ فلان…معاك وسيم صاحب الألتيما البيضا
فلان: أهلا يا وسيم
أنا: بس أبغى أعرف ايش صار في سيارتي
فلان: كم رقم اللوحة
أنا: ****
فلان: بتاع أي شركة تأمين
أنا:*****
فلان: جانا تعميد منهم؟
أنا مطرطع: يا حبيبي جاكم التعميد و طلبتوا القطع و إلى الآن ما جات!
فلان: ما تنزعج يا أخ وسيم بس حبيت أشيك معاك
أنا: المهم ايش صار على السيارة؟
فلان: دقيقة أشوف……………يا أخ وسيم 85% من الغطع وصلت و الباغي ان شاء الله بكرة
أنا: طيب خلاص ابدئوا في السيارة
فلان: لا ما يصير لازم كل الغطع توصل
أنا : أمري لله…طيب كم حتأخذ وقت السيارة؟
فلان: توصل الغطع و نشوف……
آخر شي الأسبوع اللي فات قال لي القطع وصلت و حتدخل السيارة يوم الربوع…..حبيت أشيك معاه على السيارة أمس…..اكتشفت انهم لسه ما بدئوا فيها….و قال لي بكل برود: شيك معانا و حتدخل ان شاء الله…
أنا خلاص قفلت معايا فقلت له و أنا معصب: يا خي أنا كل يوم بأشيك معاكم إلين ما جبتوا لي الضغط و السكر!
فجاوبني جواب بما معناه اذا مو عاجبك عندك مدير المعرض رح بكبك عنده….
هذا آخر ما وصل إليه الموضوع………
آآآآآآآآآآآآآآآآآآآآآآآتشووووووو!…الحمد لله
شايفين يا جماعة كيف الشركات التجارية تحرص على راحة المستهلك…..راحة المستهلك طل!…المشكلة ان فلوسهم واصلة على داير مليم….لكن مقيولة من أول: أخذنا حاجتنا طز في جارتنا<<<<النسخة المؤدبة من المثل
نظام الوكالات شوه سمعة كثير من الشركات…..الوكيل عمره ما راح يكون حريص على سمعة الشركة اللي يمثلها زي الشركة نفسها….سمعنا عن دخول السعودية في منظمة التجارة العالمية و لا شفنا شي على أرض الواقع…..متى نفتك من التجار الجشعين هذول اللي مزبطين بعض و داعسين على وجه المستهلك؟….ممكن أنا قاعد أتكلم بعاطفة نظرا لظروفي لكن هل في حقوق مستهلك عندنا أصلا؟
للأمانة الرجل تعذر لي بأنه عندهم زحمة عشان كذا طولت السيارة عندهم….المشكلة اني مهندس صناعي بتخصص دقيق في سلسلة الإمدادات…..فالحركات هذي ما تمشي عليا…..تعالوا يا عيال الهندسة الصناعية خذوا درس على الطاير في إدارة المخزون Inventory Mangemet……
سياسات الإنتاج الأكثر شيوعا في العالم هي:
- Make to stock:أو اصنع لتخزن ان صحت الترجمة….و هذا ما يهمنا الآن
- Make to order: أو اصنع في حالة وجود طلب….و هذا اللي ماشي بيه الوكيل…..ما يخلي مخزون عنده من قطع الغيار عشان لا يتحمل تكاليف إضافية….في حالة وجود احتياج لقطعة معينة يطلبها…..تويوتا هي اللي ابتكرت هذي الطريقة و سمتها “Just in Time” أو JIT
JIT سلاح ذو حدين….صحيح انها راح توفر الكثير على الوكيل بسبب انه ما راح يضطر يشيل مخزون لكنها تتطلب درجة عالية من الإحترافية و الإلتزام عشان تخلض طلبات العملاء في الوقت المحدد….و ما أعتقد انه عندنا هذا الشي في العالم العربي….عشان كذا الاستخدام السيء لهذي الطريقة راح يخلي صفوف من السيارات تنتظر عندهم و بالتالي حتؤثر على رضا العميل….و يا عمي هي فارقة معاهم؟ ينحرق العميل و أبو اللي جاب العميل….ضعنا بين الكروش يا جماعة!
دعواتكم بالله يا جماعة ان ربنا يفك أسر السيارة في أقرب وقت ممكن….درس يتعلم منه الواحد عشان يسوق زي الناس….
تحياتي لكم 
آآآآآآآآآآآآآآآآتشووووو!!!!!
أعجبني
:)
على
الله يسر امورك ويفك اسر السياره ( والله لو هي في غوانتانامو )
أهلين يا وسيم…
و الله للأسف سرت آخدت علومك من المدونة زيي زي باقي الشعب…الزمن و ما يسوي…
الله يعينك و يرجع لك سيارتك سالمةً غانمةً
عبد العزيز: شكرا
عبد العزيز عزيز: أهلا عزوز….شايف كيف الدنيا…بس بيننا اتصال ان شاء الله
الفتى الشجاع: شكرا
اولاً ألف سلامه عليك .. وما تشوف شر ..
وبالنسبة للوكالة .. الله يعينك على ما بلاك ..
والله رحمتك .. وعشت معك المعاناهـ :(
،،،
يا رب ينفك أسر السيارة ،،
والمستهلك دايم رايح بالرجلين .. ما في شئ جديد