شغب!: خاطرة في آخر يوم امتحانات…
طبعا كثير منكم يمثل له اليوم-أو بكرة- شي عظيم. أكيد عارفين ليه؟
اليوم-أو بكرة- آخر يوم لإختبارات طلاب المدارس مما يعني بداية الإجازة عند أحبابنا الطلاب و بداية الفلة و السهر و الدشرة و كل حاجة حلوة…..هنيالكم يا معشر الطلاب بالفعل شعور رائع جدا!…أتذكر آخر يوم في إختبارات الثانوية العامة-صيف 2003- أتذكر يومتها ما رجعت البيت إلا المغربية من قوة الدشرة..
بقايا ذكريات هذاك اليوم….فوضى عارمة في شارع التحلية…الشباب يا لفلفة بسياراتهم أو مسنترين في المطاعم و المقاهي المنتشرة على امتداد الشارع….و اللي يجري في الشارع من الفرحة و اللي عطل السير و اللي يرقص و اللي تستعرض هي و صاحبتها في السيارة مع “السواق”….و اللي شغتله صناعة مواكب يرقم فيها من هبت و دبت….و المضاربات و الحوادث و الشرطة و نقاط التفتيش في كل مكان…و الهيئة مسنترة عند كل سوق!
اللي غريب عن البلد و يزورها في آخر يوم من الإختبارات حينفجع و يرجع للمطار على طول يحسب إن مظاهرات أو إنقلاب صاير في البلد…ما يدري ان الشغلة راس مالها شوية طلاب!
كل سنة…حالة الإستنفار هذي تصير عند نهاية كل ترم…أصبحت كأنها ظاهرة طبيعية كالأمطار و السيول السؤال:هل أفادت حالات الإستنفار في شي؟ خلوني أصيغ سؤالي بطريقة مختلفة: هل هذي هي الطريقة الصحيحة في التعامل مع هذي الحالات؟
أبغاكم تتخيلوا أنفسكم طلاب-أو طالبات- في ليلة الأربعاء قبل آخر يوم من الأختبارات اللي طلعت عيونك-خصوصا الرياضيات و الفيزيا- و باقي عليك مادة سهلة ثقافة إسلامية مثلا…و كل اللي في البيت خلصوا اختباراتهم ما عدا انت-انتي و يجيك-يجيكي اتصال زي كذا (أحداث هذه المكالمة قد تكون صالحة للفتيات):
نفر 1: ألو
نفر2: ياواااااااااااااااد بكرة آخر يوم و نفتك من الاختبارات القرف
نفر 1:يجي يجي….ها بكرة كيف النظام؟
نفر2: مو مهم…نخلص الإختبار…نرمي الكتاب في الزبالة…نروح نفطر و دششششششششششرة إلى المغربية…نلفلف نتكي في الشارع نسوي أي شي مو مهم المهم مافي رجعة بدري….كفاية كبت و قرف في الأيام اللي فاتت
نفر1: يجييييييييي
نفر2:يلا خليني أأكد على بقية العيال…سلام
نفر1:سلام
و في نفس الوقت حطوا أنفسكم مكان الشرطة أو الهيئة و فكروا نفس تفكيرهم….حتلاقوا انهم شايفين الطلاب مجرد شوية شباب صايعين فاضيين ماوراهم شي يسووه عشان كذا لازم يستقعدوا لهم في كل مكان و يطفشوهم في عيشتهم عشان يقعدوا في بيوت أمهاتهم…
نسبيا…كل طرف وجهة نظره صحيحة….فالطلاب فيهم كمية طاقة مختزنة أيام الاختبارات ماهم عارفين فين يصرفوها على عكس أيام الدوام العادية اللي تهلكهم و تهد حيلهم…اذا ما لقوا أماكن تحتويهم و يصرفوا فيها هذي الطاقة شي أكيد و طبيعي انهم حينتشروا في كل مكان و السيئين فيهم راح يعملوا مشاكل….بينما الشرطة و الهيئة ماهي فاضية تصنف الناس كويسين و بطالين…في هذي المواقف “الخير يخص و الشر يعم”…
الأسبوع الماضي قريت حاجة لطيفة في جريدة عكاظ…مدير مدرسة هوازن الثانوية في جدة تعاقد مع مدرسة تعليم سيارات عشان تعطي دروس مكثفة في تعلم السواقة للطلاب المشهورين بالتفحيط في مدرسته عشان يقضي على ظاهرة التفحيط من طلاب مدرسته….
لو وزاراة التعليم تاخذ تجربة هذا المدير و تعممها على بقية المدارس الثانوية بحيث إن كل مدرسة يكون لها نشاط يفيد المجتمع أو الطلاب على الأقل في آخر يوم في الاختبارات…صدقوني راح نشوف أشياء حلوة كثير…بدال ما نشوف مظاهر الفوضى في كل مكان….نشوف مجموعة تنظف الكورنيش….و مجموعة ثانية تزور المرضى في المستشفيات…و مجموعة ثالثة تطلع استراحة تختم بيها أنشطة العام…أدري إني مو أول واحد يقول هذا الكلام و لا حكون آخر واحد: الطاقات هذي لازم تستغل صح و حرام انها تضيع كذا على الفاضي…..المراهقين يحتاجوا اللي يفهمهم و يسمع لهم عشان يمشوا صح….مو اللي يعطيهم ظهره و لا يعبرهم….هو المراهقين في الزمن هذا متمردين من قليل؟ لا تلوموهم لوموا اللي وصلهم لهذا الحال….
تحياتي لكم…..
أعجبني
:)
على
يعطـــيك العافية يــا مبدع [ الفيـــس ]
الحمدلله خلصت من الربوع اللي راح وماسويت مظآهره بس رحت السوق واشتريت لآني كنت مقهوره من آخر اختبار
“
والله كلامك كلو سليم خيو وسيم ..”
الحكاية يمكن تكون قضية [ تعوّد ] ..!!
الله يعدل الاآحوآل ويصلح شباب آمتنآ ..
تحيتي لقلمك
ينظفوا الكورنيش (صورة الكلب الي في المسنجر ) ؟
ايشبك (صورة الكلب الي في المسنجر ) ؟
(صورة الكلب الي في المسنجر )
الموضوع كان عاجبني حتى وصلنا للحلول!!
انا اتفق معاك انو من الحلول انو الواحد يقدر يسوي اعمال تطوعية..لكن من في اول الاجازة..الطالب يبغى فلة وينبسط .. اوكي الزيارات شي حلوة لكن اعتقد انو هادي الاشياء وقتها في وسط الاجازة لمن يبدأ الملل يزيد..لكن في البداية انو الطالب الغلبان يفلهابطريقة حضارية محترمة..
مراكز العاب..بحر.. كورنيش ووو .. اشياء كتير
طبعا انا ضد اللي حاصل الان..واتمنى انو يتعدل الوضع اليوم قبل بكرة
الله يعافيكي آشي
انتي طالبة جامعية فما تنطبق عليكي النظرية غالبا
و شكرا على مرورك
يا سنايدي
تركت لب الموضوع و ماهمك الا القشور؟….عموما هذي مجرد أمثلة للي ممكن يتسوى مو شرط انه لازم يصير
أتفهم استغرابك من فكرة العمل التطوعي لأننا بساطة ما تعودنا عليه….و بيني و بينك حل زي كذا ما راح يصير في يوم و ليلة أو حتى نهاية الإختبارات الجاية….عشان يصير شي زي كذا حنحتاج سنين و سنين و يمكن أجيال…تموت معاها عقليات و تحيا عقليات جديدة..
التصرفات الفردية في أي مجتمع يحكمها التوجه الإجتماعي…فإن كان الغالب على المجتمع دعمه لهكذا أنشطة راح تنجر معظم فئات المجتمع نحوها….أما إذا الشغلة فوضة و سبهللة زي دحين فهي فوضة و سبهللة…
(صورة كاسة البيرة اللي في المسنجر)
زي ماقلت يا قصي في ردي على السنايدي…الشغلة هذي ماراح تصير بين يوم و ليلة….حنحتاج سنين و أجيال عشان تتغير ثقافة الشعب…و النشاطات ماهي محصورة في هذي الأمثلة بل في أفكار كثيرة و يد وحدة ما تصفق زي ما تعرف…
في اليابان…البلد اللي انت متوجه له الآن…ينظف الطلاب فصولهم كل يوم حتى آخر يوم في الدراسة….برأيك…كيف صاروا كذا؟ في يوم و ليلة؟ ما أظن…احتاجوا سنين و سنين حتى ترسبت عندهم هذه الثقافة و صارت جزء لا يتجزأ من حياتهم اليومية…هم بشر زينا زيهم ما يفرقوا عننا في حاجة…احنا واقعين في أزمة ثقافة انعكاسها واضح جدا في تفكيرنا و ردود أفعالنا…
عندي كلام كثير بس أفضل أناقشه معاك وجه لوجه…
تحياتي لكم
الفكرة مهيب لب الموضوع ولا لوزه .. أنا متفق معك في الكلام الي قلته لكن الحلول الي وضعتها غير منطقية ..
الحين بدال ما تقول ينظموا مباريات / ساحات للتفحيط .. إلخ شيء ينفس كبت الاختبارات تقوم تقولي ينظفوا كورنيش (صورة الكلب حق المسنجر) ؟
ما أدري عن إمكانية تفعيلها فضلاً عن نجاح الأفكار أعلاه .. لكنها متنفس .. أما إني أتحبس في البيت أسبوعين وممكن أكتر وآخرتها أنظف كورنيش ..
عساها ما تخلص الاختبارات على كدا
يخوك غمض عيونك ثانيتين وتخيل نفسك في آخر يوم في الاختبارات .. ثمن تخيل نفسك تروح تنظف الكورنيش ، في آخر يوم ، والشمس الملتهبة فوق راسك ، في آخر يوم ، والجو الخانق ، في آخر يوم ثمن تعال قولي نظف كورنيش في آخر يوم
خلك صريح بس !
^^^^^ ياخي انت علة و الله
أنا قلت مجرد مثال..و الأفكار كثيرة…مو لازم هذا اللي يصير…
هههههههه والله الشباب مولعين عليك
عادي ياشباب ما يحتاج تنظف الكورنيش في الظهر
نظفه بعد المغرب عشان الجو الحلو والنسيم اللي يجيكم
نسيم البر مدري نسيم البحر واظنه نسيم الجبل عشان
جبال الحجاز وراكم خخخخخخ
والله فكرة متميزة بس زي ماقالوا الامم اللي فوق اتوقع
ان الشباب يحتاجون افكار فيها اثارة اكثر
وتفريغ لشحناتهم
يعني اشياء مثل الـ…. والوشسمه زذاك اللي نسيت اسمه
يعني زي كذا
عالعمووم تدونة رائعة آي ام وايتنق فور جديدك
وبس….
هلا و الله بعيال البترول
تصدق…حاسة ان جملة “تنظيف الكورنيش” قاعدة لي شوكة في حلقي
طبعا بالعقلية هذي محد راح يسوي شي لأن العمل التطوعي عندنا ما حوالك أحد…
على العموم…كان القصد من التدوينة هو توضيح ليش حالات الشغب هذي بتصير…و الحلول يعمد عهلى مخيلات الشباب
تحياتي لك
انا طبعاً ذاكرته بس الشعر بالخوف
الله يوفقك و تطلع النتايج حلوة