وسيم عازب

من بلاد الإنجليز: الحلقة الأخيرة!

نشر في 28 يونيو 2010 في Hyde Park,المملكة المتحدة,دنيا عجيبة,سياحة,لندن,هايد بارك بواسطة وسيم عازب

الحلقة الأخيرة: باي باي لندن :’(

في هذه الحلقة:

• العودة إلى لندن
• جولة في لندن
• يوم في الهايد بارك!
• باي باي لندن :’(
• خاتمة

حلقات سابقة:

نمبر ون!

نمبر تو!

نمبر ثري!

نمبر فور!

نمبر فايف!

العودة إلى لندن

12 يوم مرت كلمح البصر…..انتهى الكورس و غادرنا كامبريدج و كل واحد فينا شايل معاه مجموعة من الذكريات الجميلة و الخبرات الحلوة….وصلنا لندن حوالي الساعة 3 العصر….اوكي….عندي يومين حقعدهم في لندن قبل لا أرجع السعودية..إيش حسوي فيهم؟…..في البداية كنت ناوي أحضر مباراة الأرسنال و المانشستر سيتي لكن ما حصلت تذاكر….و المنطقة اللي فيها ملعب الإمارات بعيد جدا عن بادينقتون فكنسلت الفكرة من أساسها….

زي ما تفتكروا في أول حلقة نزلت في فندق الهيلتون أول ما وصلت لندن…..قلت خليني آخذ فندق ثاني أرخص و أوفر فلوس خصوصا اني حكون طول الوقت برة….و ما حجي الا وقت النوم….نزلت في فندق Darlington Hyde Park

تبغوا نصيحتي؟ و لا تقربوا جهة هذا الفندق..كنت في قمة السذاجة لما اخترت هذا الفندق على أساس حيكون للنوم بس….أول كف أخذته لما دخلت الغرفة هو انه مافي مكيف في الغرفة! مو تبغى الرخيص هيا أستحمل! صرت أنام و أسيب الشباك مفتوح عشان تدخل نسمة هوا…..عموما حطيبت أغراضي و حاولت أنام شوية بسبب اني مرهق و اليوم اللي قبله نمت متأخر لكن ما جاني نوم….فخرجت أشتري بعض الهدايا للأهل و الأصدقاء…

من أرهب الهدايا و أحلاها في لندن هي التيشيرتات…كل محلات الهدايا تبيع تيشيرتات مكتوب عليها تعليقات مضحكة جدا…لكن أشهرها هو التيشيرت حق “lousy T-shit”

يجي من هذا التيشيرت نسخ كثيرة: Friend, Brother,Father,Mother,Sister, some idiot 

بعد عملية التسوق السريعة توجهت لساحة محطة بادنغتون عشان آخذ لي عشا خفيف من محل حبيته من قلبي The Bagel Factory

في نفس الوقت كان في ساحة المحطة فرقة أوركسترا عاملة عرض للجمهور….هذا فيديو لهم

رجعت للفندق في حوالي الساعة 8…الساعة 9 قررت إني أنام لكن هنا جا الكف التاني!….بدأت تطلع أصوات من السقف اللي فوقي…أصوات ناس بتمشي و تتكلم….أتاري السقف اللي فوقي خشب و مافيه عازل…طول الليل و انا أصحى من أصواتهم….قال رخيص و توفير قال!

جولة في لندن

اوكي….لو عندك 24 ساعة بس و تبغى تشوف معظم معالم لندن….ايش العمل؟…بسيطة! مالك الا The Big Bus of London

قابلته صدفة بعد ما تعبت من المشي في شارع “أكسفورد” شارع التسوق الشهير في لندن…قررت اني أركبه و أشوف أكبر قدر ممكن من المعالم في لندن…عرض عليا الموظف حقهم اني اشتري من عنده تذاكر دخول متحف الشمع “مدام توسو” و “لندن آي”….بما أن الوقت ضيق فلازم أختار واحد من هذول الإثنين فقررت اني أروح “لندن آي”…..

هذي بعض المعالم اللي مرينا عليها بالباص اللي مليان عجايز

هذا المبنى هو الوحيد الباقي من أيام حريق لندن الكبير عام 1666 م…..

و بس….في نص الجولة خلاص زهقت من التصوير و سنين التصوير فرميت الكاميرا في الشنطة …..رجعت الفندق بعد يوم طوييييل و حافل…باقي أقل من 24 ساعة على الرحيل……

يوم في الهايد بارك

الأحد 25 فبراير….آخر يوم ليا في انجلترا…..و كعادة الأشياء الحلوة تنتهي بسرعة…..

أنهيت إقامتي في الفندق و خليت أغراضي عندهم بحكم ان رحلتي الساعة تسعة المساء….باقي أكثر من 12 ساعة قبل السفر…خرجت من الفندق عشان أفطر إلا الدنيا تمطر لأول مرة من يوم ما جيت انجلترا!….كانوا يقولوا لنا انتو محظوظين من يوم ما جيتوا وقفت المطرة….لكن الظاهر لندن حزينة على فراقي……

و أنا قاعد أفطر قاعد أفكر: في شي ناقص ما سويته….ايش هو ياربي ايش هو؟ ايوة صح! ركن المتحدثين في الهايد بارك!

لو تتذكروا الحلقة الثانية لما رحت للهايد بارك يوم السبت و ما لقيت أحد في ركن المتحدثين؟….السبب بكل بساطة ان الناس ما تجي تتكلم الا يومي الجمعة و الأحد…و من حسن حظي إننا اليوم الأحد ….

انطلقت على الهايد بارك على أمل إني ألاقي كثير من الحماس و الأكشن…..لكن للأسف ما لقيت أحد!….بس بما إن الجو كان رائع جدا قعدت أصور في الحديقة شوية

فجأةّ…..ألاحظ من بعيد بذرة تجمع….

و انطلق جري عليهم….

قابلوا الشيخ محمد داوود..شيخ أمريكي مولود في لندن و عاش حياته قبل إسلامه في بروكلين، نيويورك متزوج من مغربية….عاش أربع سنوات في السعودية قبل عشرين سنة منها سنة في جدة….كان ساكن جنب دوار الدراجة…يقول أيامها كانت المنطقة فاضية مافيها أحد…أما دحين مافيها مكان تحط فيه رجلك!….

في البداية كنت أظن انه راح يتكلم لمدة 20 دقيقة نص ساعة بالكثير…..لكن الشيخ قعد يتكلم على فترتين….كل فترة ساعتين….طبعا لأن التكنولوجيا لها حدود فما قدرت أصور لكم إلا أول ساعة من الكلام…

من كلامه اللي عجبني:

1-قوله عن شيخ سوداني قال له ذات مرة:The promised land is for those who keep their promise to god….have keep our promise to god?

الأرض الموعودة “أي فلسطين” هي لمن حافظ على عهده مع الله….هل حافظنا على عهدنا مع الله؟

2- قوله أيضا:”لقد فقدنا إحترامنا للإخوة المسلمين من الشرق الذين يتركون بلادهم و يفرون من الطغاة فيها بحثا عن حرية لم يكتسبوها بأنفسهم…سوف يظلون دائما مطاردين مهانين….

أسيبكم مع الفيديوهات ….كل فيديو مدته عشرة دقايق….

بعد الظهر قررت آخذ بريك من ركن المتحدثين و أروح أتغدى….طيب…ايش أقرب مطعم؟ أقرب شي كان كنتاكي اللي في شارع أوكسفورد….أول مرة أشوف كنتاكي بهذي الزحمة! مررررررررة زحمة لدرجة انك ما تلاقي مكان تقعد فيه بسهولة!…..يحق لك يا كنتاكي تسوي كذا….دام ان البيك مو موجود ألعب بذيلك زي ما تبغى!…..

رجعت لركن المتحدثين مرة ثانية…الشيخ محمد داوود استانف حديثه ثاني….رحت أشوف باقي الناس اللي قاعدة تتكلم ايش عندها

باي باي لندن

الساعة خمسة…..توجهت للفندق و أخذت أغراضي و انطلقت إلى محطة القطار….بس قبلها وقفت في أقرب بقالة و اشتريت لي كمية لا بأس بها من الكيت كات الإنجليزي…بالفعل طعمه مختلف عن اللي عندنا

بديت أدخل جو كآبة ما بعد السفر….لكن على الأقل كان ممكن يكون الوضع أسوأ مما هو عليه اذا ما كانوا استأنفوا الرحلات في هذيك الفترة….

الرحلة هذي خلتني أتأكد إنه مهما إفتكرنا إننا نعرف أشياء كثيرة عن هذا العالم  نطلع ما نعرف إلا أقل القليل….

الرحلة هذي خلتني أحب التصوير…ما أقول إني راح  أكون مصور محترف أو حتى هاوي…لكني على الأقل أدركت أهمية توثيق اللحظات الجميلة….

الرجلة هذي فتحت لي آفاق جديدة في التدوين….خلتني أنظر للتدوين بطريقة مختلفة….

غادرت لندن…و تركت فيها جزءا من قلبي…يمكن أرجع له في يوم من الأيام أنا و حبيبة قلبي….أقول بلا كلام كثير  صحصح و خليك في الأمر الواقع هذي وحدة سقطت عليك في طابور الجوازات في مطار جدة المصدي!….شوف الحرمة!…دوبك مسوية فيها حضارة و إحترام للنظام لحقتي في ستة ساعات ترمي كل الشعارات هذي؟يارجال احنا اللي أعطيناهم وجه مشي حالك بس…..

أخذت شنطتي و خرجت من المطار إلا و يستقبلني هذاك الحر!….من 14 درجة مئوية إلى 47!……آآآآآآآآه إيش أقول بس؟!

بلادي و إن جارت علي عزيزة………و أهلي و إن ضنوا علي كرام

تمت بحمد الله….

خاتمة

بكذا نكون انتهينا من سلسلة “من بلاد الإنجليز” و لله الحمد….إن أصبت فهو بتوفيق الله و إن أخطأت فتعرفوا من مين ….أتمنى إني أكون أفدتكم و لو بشيء بسيط…..ترقبوا جديد مدونة عالم وسوس و مدونة ستوديو 15 بودكاست…

تحياتي لكم….