أهلا
عدنا إليكم بطلة جديدة و تحديثات كثيرة…
زي ما انتو شايفين غيرنا الثيم….التغيير حلو يا جماعة
عملنا أبقريد لوورد بريس 2.7 …الصراحة تطور مذهل
لو حركتوا عيونكم شوية لليسار حتلاحظوا حاجة حلوة…ما يحتاج تتعبوا أنفسكم تدخلوا المدونة كل شوية عشان تشوفوا الجديد….الصراحة أنا إنسان كسول و راح أتعبكم….أشتركوا في القائمة البريدية و راح يوصلك جديد المدونة لإيميلك
هاف فن….و تذكروا دايما إن الحياة حلوة…..أسيبكم مع Jason Mraz و أغنية “Life is Wonderful”
قبلاتي الحارة
Audio clip: Adobe Flash Player (version 9 or above) is required to play this audio clip. Download the latest version here. You also need to have JavaScript enabled in your browser.
تحديث: آخر ثيم استقريت عليه 
عهد جديد
ننتظر ما يحمله لنا من أحداث و مفاجآت
فقط ننتظر…….
.
.
.
.
أعيش حاليا فترة معاناة…
تطمنوا كلكم….ما عندي انفلونزا و لا مغص و لا شايل هم الزواج…
المعاناة اللي أعيشها من نوع ثاني…اكتشفتها مؤخرا بعد ما تكيفت مع الحياة الجديدة…
الموضوع و مافيه يا سادة يا كرام إني ما أتكلم بما فيه الكفاية!
“طيب….ايش اللي مانعك تتكلم؟”….سؤال أكيد بتسألوه
المشكلة يا جماعة ما في اللي أتكلم معاه!…أو بالأصح مافي مواضيع تثير الإهتمام إني أتكلم فيها مع أحد…
خلال الأسبوع هذا قعدت مع نفسي اكتشف الفروقات بين أيام الجامعة و فترة ما بعد الجامعة….اكتشفت ان “ستاندردز” المواضيع اللي أتكلم فيها مع اللي حولي طاحت بشكل فظيع!
من بعد النقاشاات الراقية مع الشباب و التحدث في مواضيع عميقة و الكوميديا الراقية ”الله يذكرك يبو صطيف بالخير
“….إلى الغيبة و النميمة وفلان راح و فلان جا و إذا ضرب عيار الثقافة للسقف كان الكلام عن السيارات و مباراة الأمس!
الله يعز أيام الجامعة…بالفعل كانت أيام ذهبية لا تنسى……
و الله يعينني…على المعاناة الفكرية اللي أنا فيها
مواطن مطحون
حلوة إجازة الحج….
أحلى من إجازة عيد الفطر بمراحل…على الأقل بالنسبة ليا…
و كموظف يكرف من 9 لـ 6 قررت اني استغل هذي العطلة الجميلة و أبعد شوية عن رتابة جدة…
بما إني البكر…و أعيش في بيئة ديمقراطية صحية جدا:d…قررت- بمحض إرادتي العليا و ليس عن طريق شرع الغاب أو حكم القوي- إني أقضي هذي الإجازة مع العائلة الكريمة في طيبة كبقية الجداوية اللي فاكرين ان 25 درجة مئوية هي درجة تجمد المويةكما قررت اني أعتذر للشباب اللي كنا ناويين نطلع سوا مع بعض إلى “س” من الأماكن الطيبة…طيب و التذاكر اللي اشتريناها؟….هع…يمدحوا سياسة الاسترجاع…و هو في أحلى من قضاء العطلة مع مجموعة من الأطفال المزعجين؟
===========
“الديموقراطية”
ما جابنا ورا الا هذا المصطلح…
بما إني أمير هذي الرحلة و الآمر الناهي فيها “بالإسم”…قررت اني اطبق “الديموقراطية” المزعومة اللي تعلمتها في الجامعة عشان بس لا يزعلوا الشباب في نزاعات الغدا “بكي و لا شواطئ؟”…
قال ديموقراطية قال….قلبك أبيض يبو الوس….كريمتنا المصون “اقترحت” و في رواية أخرى “أزبدت و أرعدت و هددت ان لم أستجب لمطالبها فما راح تخطب لي من صحباتها الشيفات أمهات الركب السود”…المهم “اقترحت” علينا ننزل في فندق من ذوات النجوم الأربع…و الألف خطوة بعدا عن الحرم….و السبب ان “الرفيقات” نزلوا في نفس الفندق و “نبغى نقعد مع بعض”
أمري لله…تفضلي يا ستي أمرك مطاع و طلبك مستجاب…
خلصنا من طقوس الاستقبال و رحنا للإصنصير يقودنا للمجهول…و وصلنا للدور اللي نازلين فيه…و يستقبلنا عند باب الأصنصير…أحد ألد أعدائي….إن لم يكن عدوي رقم واحد……
========
“مين هذا عدوك اللدود يبو الوس؟”
يا جماعة تعبت في وصفهم…اللي أقدر أقوله انهم مخلوقات تتراوح أطوالها من 70-100 سم قد يزيدوا أو ينقصوا حسب الاشعاعات النووية الي يتعرضوا ليها…القوة الصوتية عندهم أعلى من 10000 ديسبل….و يضاهوا الجن الأزرق في السرعة و خفة الحركة عند تعاطيهم للسم الأبيض……..السكر…..تتضاعف طاقتهم بشكل مهول و خرافي عند تواجدهم في جماعات…يسميهم العلماء و أصحاب الإختصاص “أطفال”….أما أنا أسميهم “جن”…..
فين كنا؟….ايوة عند باب الأصنصير…المهم انفتح الباب و عينك ما تشوف الا النور…..أطفال….عفوا جن كثيييييييير ماليين الممر و هاتك يا جري و نطنطة و صراخ..تجمهروا حولنا أول ما دخلنا كأننا دخلنا بيت أبوهم..و تشعبطوا فوق شنطنا و أي شي….
الساعة في حدود الواحدة فجرا…نبغى نرتاح من تعب الطريق…و هذول يلعبوا في الممرات طيرة….دق دق دق دق دق دق دق دق دق دق دق….صوت ارتطام أقدام الجن بسيراميك الممرات…غضينا النظر عن الموضوع أول يوم لأننا مرة تعبانين و محد له خلق للمشاكل…
اليوم الثاني….
بدت بوادر الإنفلونزا تظهر على المواطن المطحون-اللي هو أنا باي ذا واي- و مالي خلق لأي وجع راس اضافي….خصوصا ان “الجن” اوقفوا نشاطاتهم الساعة 8 صباحا و استلموا الوردية جن ثانيين- اللي هم أخواني…
“الفرار الفرار”…الفكرة الوحيدة في راسي….قررت النفاذ بجلدي الى الحرم و أداء الزيارة….
انتهى اليوم…و أعراض الانفلونزا عندي تزيد….قررت الراحة و الخلود الى السرير الساعة 9…..الوضع هدوء و كل شي تمام…
9:30
وااااااااااااااااااااااااااااااااااااااااااااااااا اااااااااااااااااااااااااااااااااااااع
دق دق دق دق دق دق دق دق دق دق دق دق دق دق دق دق دق دق………………………
الجن رجعوا من جديد!
طيب ايش العمل؟!
طلعت اديتهم نظرة يمكن يفهموا….مع اني متأكد اني لو فتحت راس أي واحد فيهم ما راح ألاقي الا زنوبة مقاس 46
10:00
مافي فايدة…
10:30
الوضع من سيء لأسوأ
11:00
خلاص!….طفح الكيل
خرجت لهم و زعقت عليهم زعيق طالع من قلب…..آل عازب لاجوا يناموا لحد يدوس لهم على طرف!
شردوا و تفرقوا زي ما تتفرق الصراصير لما ينهشوا من على أكل بايت…
ما وقف الموضوع عند هذا الحد….اتصلت على الاستقبال و نزلت كل شياطيني عليه!
قال لي : ” و الله يا بيه احنا تعبنا معاهم كلمنا ابوهم تلات مرات قال لنا خليهم ينبسطوا عيد”
نعم؟ عيد؟….و الناس اللي تعبانة ملعون جدفها عشان خاطرك انت و غنمك؟
كنت بروح لأبوهم و ناويها شر….الا الوالدة قالت لي تعوذ من ابليس ما نبغى مشاكل….و الصراحة معاها حق…
رجعت لسريري و بدأت فكرة هذا الموضوع تجيني….
النقطة اللي ابغى اوصلها لكم و اتمنى ان جيلنا ما يغلط نفس غلطة الجيل اللي قبلنا…
صحيح ان الرسول صلى الله عليه و سلم قال: (تزوجوا الودود الولود فإني مكاثر بكم الأمم يوم القيامة) لكن في نفس الوقت قال: (كلكم راع و كلكم مسؤول عن رعيته)
موضوع الخلفة و تربية العيال عندنا في السعودية ماشي بالبركة عند فئة ليست بهينة….فئة ماشية بمبدأ “خلف و ارمي و الشارع يربي”…الواحد منهم يشتهي الطفل كأنه يشتهي آيسكريم…لا جا وقت الجد رماهم على الناس يزعجهم بيهم…
بعض الحريم تقعد تخلف و تخلف و تخلف بدون تفكير……لدرجة ان في حريم-و الله على ما أقوله شهيد- الفرق بين بعض عيالها10 شهور حق النفاس و الحمل…بس عشان تقهر ضرتها و لا أم زوجها…أي منطق هذا؟
يا جماعة…أنا ما أدعي الى تحديد النسل….خلفوا زي ما تبغوا هو ناقص من راتبي شي؟….لكن لما الواحد يبغى يسوي شي يكون قده……يربي عياله مزبوط و يأدبهم….مو يعمل العملة بعدين يهرب منها و يخلي عياله يزعجوا الخلق..
==========
نسبة الشباب العاطل كبيرة….نسبة العوانس أكثر…و السبب بعد الغباء الاجتماعي اللي نعاني منه هو الاستهتار و عدم تحمل المسؤولية…سبب هذا الاستهتار عدم وجود بيئة سليمة يتربى فيها الطفل..و من فين تجي البيئة السليمة و الأب يالاهي مع اخوياه في الاستراحة و الأم مع صحباتها….أو ان الأب شايب عايب و الأم مراهقة!
نصيحة لشيابنا الأعزاء و كل واحد منكم يوصلها لأبوه خصوصا اذا كان قرفان من الأطفال زيي: إذا نويت تخرج وقت المطر استخدم مظلة و لا راح يجيك زكام….و الشاطر يفهم
ياشباب…اذا تزوجنا بإذن الله خلينا نعتبر أولادنا مثل مشروع استثماري طويل المدى…نستثمر فيهم مزبوط عشان نحقق أرباح خيالية….و لا نعتبرهم مثل أسهم بيشة الزراعية نأكل بها هوا بعدين….
الوضع بإختصار في المدينة المنورة بجوار الرسول كالتالي: الأطفال بيكسروا الفنادق….و الشباب و الشابات غزل و معاكسات عند سور الحرم….و كل من زار المدينة يعرف الشي دا…..ماينلاموا….هذي نتايج سياسة “خلف و ارمي و الشارع يربي”….عشان كذا بأقول: يا شيابنا الأعزاء….لموا عيالكم!
تحياتي….
مواطن غاضب و مطحون….
سلام عليكم…..
اليوم راح أتكلم عن وحدة من أعظم الخبرات اللي تعلمتها في حياتي الجامعية….و الصراحة ما تعلمتها بالساهل….النوم طار من عيوني أيام و أيام الين عرفت الطبخة….
بس أول شي أحب أشكر واحد من رماميتي الأعزاء…اللي كان له الفضل بعد الله في اكتشافي لهذا التكنيك الرهيب…ماراح أقول اسمه طبعا منعا للفضايح لكن اسمه الحركي “أبو صطيف” 
:)
على